11/12/2018
韋特「試用期」完即劈炮 足總又要頭痕搵新主帥
作為一個香港人,Jenny當然都會留意吓香港嘅體壇,港足更不在話下,小妹最記得就係前港足教練金判坤(Kim Sir)帶領港隊喺2015年世界盃外圍賽,主、客場皆賽和中國隊,嗰陣全城都為港隊歡呼,非常熱血。一句「香港勁揪」,不知喚醒幾多人嘅回憶!
(足總fb圖片)
韋特呢頭話唔Do 嗰頭賣身日本球會
可惜Kim Sir上年就返咗南韓老家,港足就搵咗9個月先至搵到個新教練加利韋特(Gary White)替補,點知佢做咗3個月就「跳槽」去日本一個球會做主教練,港足又變返無主孤魂喇!陰功!
如果本身係好地地請韋特都算,據Jenny所知,當時足總完全唔按程序去請佢,喺截止申請後提交都肯收佢份報名表不特只,仲要遴選都未完就已經私下同韋特簽「擬定合約」。搞到當時嘅香港足總董事梁芷珊(Canny)激到要辭職抗議,喺Facebook大鬧「假設『全球招聘』呢個動作應該有十個程序,咁我可以講,今次聘請Head Coach (HC) 既程序,由一至十都係錯」。
梁芷珊諷刺:「種因得果」
今次韋特一完試用期即走,Canny都諷刺足總今次係「種因得果」,直插「遴選小組同董事會嘅責任係監察,成班人坐喺度開會唔係做緊監察,淨係舉手通過」,結果就「為人鋪踏腳石」喇!佢文中語帶仲嬲嬲咁話,「一個機構如果係咁嘅管理及行政思維,係唔會搵到好嘅人合作,亦都唔會有人可以長期合作」。咁又係呀,港足由千禧年開始,18年間就已經換咗10次主帥,Kim Sir都已經係港足上世紀九十年代以來在任時間最長嘅教練,咁換人法,港足都好難Keep住水準喇!不過,睇波梗係要有花生食先得㗎嘛,你說對不對?
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇