噚日講完陳凱欣同建制派嘅「愛情故事」，今日佢哋就入立法會「行禮」啦！講梗嘅就係阿欣今日要喺立法會宣誓吖！

你睇阿欣笑得幾甜，同好似結婚簽紙一樣。

　　話晒宣誓呢啲咁重要嘅時刻，就梗係希望自己最親嘅人都喺齊到啦！所以今日阿欣老公（邱文華）同埋爹哋媽咪都有嚟到立法會見證，不過阿欣呢頭成功宣完誓，轉個頭就有甩轆事件發生喇！

一樓會議廳前影影下畀保安哥哥趕走。

 移師到立法會大樓樓下大堂，保安哥哥都話No Way

阿欣「三遷」影相位下次講明先

　　話說，阿欣宣完誓之後，佢老公（邱文華）同埋爹哋媽咪就由公眾席離開。阿欣今次有進步呀，有事先同傳媒講低會同家人影張全家福。所以去到一樓會議廳嗰層時，阿欣一家就Sweet Sweet咁，行到會議廳前廳門前位置合照，當然謀殺唔少菲林啦！不過，影影下保安哥哥突然攝出嚟，唔係想合照埋一份呀，而係阻止大家繼續影。結果阿欣要移師到立法會大樓樓下大堂，保安哥哥都話No Way，最後要出到門口先有得影。

出到門口就OK喇！

　　保安哥哥因乜解究咁唔通氣呢？原來根據《立法會綜合大樓議員辦事處使用指引》寫：「在立法會或其轄下委員會舉行會議期間，議員訪客除了到訪二樓的觀景廊或二樓或三樓的公眾席外，不可進入會議場地所在的樓層（即立法會綜合大樓一樓或二樓）。」 而立法會嘅《採訪指引》亦都話：「傳媒代表只可在立法會綜合大樓以外地點訪問旁聽會議的公眾人士。」阿欣「三遷」之後，就拜託行家們將喺大樓入面影嘅相「抹咗佢」，亦都要求保安「你下次同我講清楚」。

一場誤會 和氣收場

　　阿欣嘅助手就同Jenny解釋，其實佢哋今日仲未收到有關立法會嘅指引，阿欣團隊事後亦都出返條聲明，話係「與保安人員溝通誤會所致」。另一方面，Jenny就向一啲攝記大佬打聽到，其實阿欣助手同佢哋講咗阿欣會帶屋企人落嚟，所以佢哋先Set好晒嘢，而且係阿欣拖住媽咪過嚟合照。

　　雖然阿欣助手就話未收到指引，不過其實指引一直喺立法會網站有得Check，而且阿欣既然「有傳媒DNA」，下次就唔好畀「蕉皮」行家踩喇！好彩今次大家都和氣收場咋！