13/02/2018
年廿八洗邋遢!幫政府班子「洗底」有咩辦法?
正所謂:「年廿八洗邋遢!」,Jenny就覺得順便幫政府都「洗埋」一份就最好喇!所以噚日通訊局主席王桂壎就身先士卒,主動請辭,先「洗」走自己噃!而小妹亦都諗到計仔幫林鄭班子「洗洗底」!
是咁的,王生噚日突然公布,原來自己喺做主席嘅兩年前買入咗一批股票,其中一隻係中移動(00941),因為疏忽所以當時冇按規定向通訊局披露持有呢隻股,去到近排沽出先發現。王生話,因為已經沽咗,所以冇辦法補救,就決定請辭喇!佢仲話,雖然今次冇影響到任內處理通訊局嘅事務,亦冇引起咩利益衝突,但覺得「規矩終歸係規矩」、「疏忽唔係理由」,所以辭職係最恰當同埋最負責任嘅做法喎!
究竟鄭司長會唔會唔撈或者被唔撈呢?大家拭目以待!
鄭若驊民望新低 林鄭仲想佢留低?
係唔係好抵讚呢?啲確Jenny都聽到坊間唔少評論讚王生有承擔。至於Jenny硬係覺得呢幾句好熟口面,好似講緊畀某位僭建司長聽咁嘅?不過有一樣嘢可以肯定嘅,就係呢個諗法唔係得小妹一個人咁諗,所以老細林鄭今日都被人問,王生咁做係唔係做咗個「好榜樣」畀鄭司長呢?林鄭梗係要睇住啲細喇,就話佢哋兩個個Case係唔同,鄭司長都已經從多方面去處理,大家就「無謂作不必要嘅聯想」喇!
雖然林鄭就好照住啲細,但係服唔服都係睇市民嘅啫!今日港大民研就公布咗政府官員嘅最新民望值,鄭若驊係三位司長入面民望最低之餘,仲刷新咗歷任律政司司長嘅民望新低,睇嚟市民就唔係好滿意喇!Jenny仲聽到啲風聲話,如果鄭若驊再有行差踏錯,上頭都傾向換走佢添!
王桂壎資歷夠 阿爺都受!
換走鄭司長咁搵邊個頂先?小妹就諗到個好計!咪就係換入啱啱「洗」乾淨嘅王生囉!首先佢喺法律界都頗有聲望㗎!仲係做過香港國際仲裁中心主席,鄭若驊未做司長前都係接佢棒做主席之嘛!最重要係咩?阿爺都Like佢吖嘛!
Jenny仲聽到一啲推論,今次王生自爆,無疑係賺咗個「專業」嘅好形象,如果某日鄭司長真係唔撈/被唔撈,呢位咁「負責任」嘅王生就係最適合嘅接任人選啦!Jenny就奉勸仲有邊位想洗底入政府嘅,就快快趁年廿八「洗乾淨」喇!升官發財其實唔難!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇