30/01/2018
新東大混戰 得選舉主任得天下
立法會補選提名期喺噚日結束咗,有啲早報名嘅參選人仲已經確認咗提名添!而一啲好有爭議性嘅Case都被選舉主任「一錘定音」咗,咁Jenny今日同大家總結吓暫時地區直選嘅形勢先!
戰況最激烈嘅非新界東莫屬!上排:(左起)范國威、黃成智、陳玉娥、鄧家彪;下排:(左起)陳國強、趙佩玉、方國珊、劉頴匡。
娥姐玉姐成「娛樂擔當」
戰況最激烈嘅都非新界東莫屬,有成8個人報咗名,不過報咗名就唔代表實選到嘅,因為仲有選舉主任呢一關要過呀嘛!而家8人入面,有5個已經確認咗資格,包括建制代表鄧家彪(阿Bill)同埋泛民代表范國威(咖哩飯),仲有最早報名想同楊岳橋……做同事嘅陳玉娥(娥姐)、屢敗屢戰嘅方國珊(哪吒)同埋受上帝感召參選嘅性傾向條例家校關注組成員趙佩玉。Jenny私心覺得呢區最有睇頭!齋係娥姐同玉姐(趙佩玉)嘅娛樂性,都已經高過晒其他區啦!
陳國強做超級Deadline Fighter勁過政府
至於屬本土派嘅劉頴匡、陳國強,仲有前民主黨成員黃成智都係未收到確認,而且陳國強上次2016年選舉都已畀人DQ過一次,今次佢就收到選舉主任叫佢定義「香港獨立」同埋「港獨派」,仲要24小時內回覆。嘩!咁似大學啲功課題目嘅?陳生都囧咗,高呼「相信政治系畢業的師兄,都不可能在24小時內能完美演釋!」Jenny真係好少咁認同佢講嘢!
正如陳國強fb所言:「得選舉主任得天下!」題目始終都係要答嘅,陳生一於以其人之道還治其人之身,學政府咁做個Deadline Fighter。選舉主任電郵要求佢今日下午3點前回覆,佢就2:57先Send出。今次都可以話係畀個機會佢搵返學生時代嘅感覺囉!
九龍西人少花生多!(左起)鄭泳舜、姚松炎、蔡東洲。
九龍西少少人多多趣 港島有人想冷手執個熱煎堆
九龍西嗰邊就人少少花生多多!三個候選人鄭泳舜、姚松炎同埋蔡東洲亦都確認咗參選資格喇!其中最有DQ危機嘅姚松炎都過到骨,Jenny同好多行家都非常Surprise!到咗真係做選舉工程時,Jenny會比較期待舜仔仲會唔會得到高人「指點」呢?
反而最初以為會冇事嘅周庭就喺港島被人「叮」走咗,所以做Plan B嘅南區區議員區諾軒就突擊參選,但係仲未有確認,講真有周庭前車之鑑,區諾軒被DQ個可能性真係唔可以話冇!之不過,佢又冇提「港獨」,又冇話「自決」,可以點D佢呢?Jenny仲記得上次周庭傳被人DQ之際,佢對手陳家珮(Judy)嘅師傅葉劉就好驚有反彈,大嗌「唔好」;如果今次連區諾軒都要被DQ,葉劉又會唔會幫吓口呢?
港島區區諾軒如果畀人DQ埋,泛民就冇代表喇!上排:(左起)區諾軒、陳家珮、任亮憲。
另外,本身想冷手執個熱煎堆嘅「維園阿哥」任亮憲,都已經拎到確認喇!而有兩位最後一日先衝出嚟報名嘅伍廸希同馬金泉,選舉主任應該就係未處理得切,所以都係未獲確認。Jenny睇嚟,呢場戲仲有排追呀!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情