08/01/2018
馮志堅退而不休夥「茶王」出山創業賣奶茶
唔知大家覺得最能夠代表香港嘅食物係乜嘢呢?Jenny就覺得係絲襪奶茶啦!(That's why 大台用來做溏心風暴3嘅主題囉!)金銀業貿易場永遠名譽會長,兼前立法會金融服務界議員馮志堅(堅哥)都同Jenny一樣睇法噃!佢就開咗一間中高檔嘅港式茶餐廳,仲同「茶王」羅德拍住上添!
今日Jenny就去咗佢哋個開幕禮,趁機試吓「茶王」嘅手勢呀嘛!一入到去果然就已經茶香四溢,Jenny都忍唔住要拎返杯過吓口癮先!
「茶王」羅德名不虛傳,沖出來嘅奶茶又滑又香!
「好好味呀~~~~~~~!」
堅哥就同Jenny講,係遇到茶王之前,佢都好耐冇飲返杯有質素嘅奶茶啦!Jenny個腦即刻出現咗《食神》入面嘅著名台詞:「好好味呀~~~~~~~!」唔怪之得堅哥要將個鋪頭名起做「我杯茶」啦!相信喺佢眼中應該淨返「茶王」杯奶茶入到佢眼喇!
講返呢位「茶王」羅德,好猛料㗎!拎過2010年港式奶茶國際比賽冠軍,之後喺2011年金鴛鴦比賽同樣拎咗個第一,不過之後就因為有意退休,所以近年少咗出山獻技。
堅哥(右二)好友們包括中銀國際副董事長林廣兆(右一)同埋立法會前議員吳亮星(左二),當然都有來捧場啦!
一張金牛=45分鐘任飲極品靚奶茶
Jenny見到嚟到嘅嘉賓人手一枝樽裝奶茶噃!堅哥話原來樽裝係凍飲版嚟嘅,風味又唔同呀嘛!咁唔知堅哥鍾意飲熱嘅定凍嘅呢?佢就話奶茶梗係趁熱飲好啦!
只不過而家好多茶餐廳入面,奶茶變咗做套餐嘅贈品,好多時仲要未食完嗰餐,杯奶茶就已經上咗枱,攤凍晒,仲邊好飲呀!所以佢就靈機一觸,諗到係佢哋間鋪頭入邊特設咗一個VIP區,只要擺低一張金牛,就可以約埋三五知己喺入邊坐45分鐘吹水,仲可以無限添飲奶茶添!一張金牛任飲奶茶一個鐘,抵唔抵就要大家自行斟酌喇! Jenny就經常同朋友去high-tea,條數除開都係差唔多,話唔定有姐妹有日想轉吓口味,齊齊嘆milktea㗎!堅哥到時記得畀返個折頭Jenny啊!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情