民建聯年年都搞個「年度漢字」公投，叫大家喺10個漢字入邊評選最能夠代表到今年嘅字。嗱！識投一定投呢啲啦！話晒民記有大水喉，投完有機會拎到雙人來回機票，可以喺亞洲區內任揀目的地！

呢張相絕對潛力圖！

何俊賢新朵「漁農界才子」？

　　今日Jenny就去睇吓今年民記有咩搞作先！今日個記招就由大埔區議員譚榮勳Eric拍住「漁農界才子」、立法會議員何俊賢(Steven)主持。其實「漁農界才子」呢個花名，如果唔係Eric講，Jenny都未聽過！唔通Steven除咗高之外，仲可以開僻多條「文青」路線，同一樣出身於大西北嘅「MK文學男神」鄺俊宇撼過？話口未完，Eric就交咗個咪畀Steven介紹今年嗰10個候選漢字喇！

講起「樓」就諗起「貴」

　　今年嘅十大漢字就有：「貴」、「樓」、「公」、「新」、「回」、「智」、「判」、「風」、「創」、「民」十個大字，Steven喺介紹呢幾個字嘅時候，都講咗少少佢對啲字嘅睇法。講起「風」佢就話諗起《詩經》嘅「風雅頌」、講「智」又諗起「仁義禮智信」、講到「民」，仲搬埋孟子兄出嚟，吟返句「民為貴，社稷次之，君為輕」添！Jenny仲以為講起「民」，乜唔係應該諗起自己個黨民記咩？

　　講到Steven嘅心水，佢就話係個「新」字喎！因為「新」好似冇咩負面意思，唔似得有啲字有正負兩種意思，好似「創」字可以係「創新」或者「創傷」，「新」就係「新鮮」、「新風」。佢仲問Eric可唔可以即場拉票添！哎呀「才子」！個選舉你哋搞㗎嘛！feel free to拉票！

「安」「穩」去咗邊？Steven話問返評審先

　　話時話，Jenny睇返上幾年嘅十大漢字，差唔多年年都有「安」同「穩」呢兩位佳麗㗎噃！所得票數仲唔低，長期排三甲添！點解唯獨是今年呢兩個都榜上無名呢？唔通香港已經唔再「安穩」？呢個疑問同時考起咗台上兩位，佢哋停咗大約兩三秒，耷低頭睇返份資料，之後對望一眼，Steven先話：「咁就要問返評審喇」！仲咋咋臨兜返,話應該係因為呢兩個字就已經變咗市民嘅共同方向，已經唔需要再拿出嚟。Eric都估近幾年社會「平和咗」，反而呢兩個字就冇咁易入到班評審嘅腦喎！

「大灣計畫」夠創新呀！

　　講到參加人數，Eric話上年都有萬三人參加，希望今年可以有兩萬人啦；不過Steven就一於玩大啲，直情話最好就梗係全香港700萬人都參加，再整多個「廣東計畫」，畀啲返咗大陸住嘅香港人都可以玩埋一份！Jenny覺得近排咁興講「大灣區」，不如索性再去盡啲搞「大灣計畫」啦！夠晒創新！係咪先？