16/10/2017
李浩然冇副局做都唔愁 獲安慰獎晉身「傑青」
之前未公布副局長同政治助理名單嘅時候,有消息話副局人選中,有兩位係「紅底」人士,分別就係蔡若蓮做教育局副局,同埋李浩然做民政事務局副局。但係Jenny就收到風有「話事人」擔心,一個蔡若蓮當時已經好大爭議,為咗「和諧、和諧」就決定「棄李保蔡」。結果蔡校長真係做咗副局,而民政事務局副局長就係由陳積志出任,李浩然雖則榜上無名,但係今日Jenny喺另一個場合到就見到佢榜上有名喇!
傑青李浩然教大家揸筷子!
「十大傑青」有6個 頒獎遇上8號波
Jenny年年都會留意「十大傑青」嘅消息,叫得「傑青」顧名思義年青有為啦,如果畀Jenny識返一個半個做Friend子都幾Happy!所以今日Jenny就一於去會一會幾個出爐嘅傑青先!雖然叫「十大」,大家唔好以為有10位得獎者,其實上年只選出5個!今年好少少,有6個。
作為首席評審嘅胡定旭仲話,今年選舉可以話係「大風大浪」,因為評選同埋頒獎日天氣都唔好,噚日仲打埋8號波,攪到頒獎日延至今日。佢又話有好多參加者實力都好接近,但係「傑出」同「優秀」又不同,所以最後決定咗好耐先揀到6個得獎者出嚟喎!咁Jenny就同大家嚟睇吓今年「六大」傑青有啲咩人啦!
鄭致知(舞台劇工作者)
耿曉靈(香港武術運動員)
郭灝霆(香港前單車運動員)
李浩然(團結香港基金會副總幹事)
鄧智傑(高盛亞洲投資管理團隊主管、城市大學經濟及金融系兼任教授)
王家俊(註冊老師、社工及輔警督察)
李浩然愛筷子 話係中國人嘅標誌
燈燈燈櫈~~~李浩然喺呢到就榜上有名喇!所以話塞翁失馬,焉知非福!計Jenny話,「傑青」呢個名可以名留青史,每年都可以拎出嚟講吓,做唔到一個市民都噏唔出名嘅副局,又有咩所謂呢?
不過李生就算做咗傑青,得獎時都不忘宣揚吓佢啲愛國理念!佢話自己會投入《基本法》嘅研究工作係因為呢個係佢嘅「個人興趣」。仲話作為香港人,冇理由唔識自己嘅「家規」㗎嘛!大會叫各位得獎者拎一件物品嚟做分享,李生就拎出一對加大碼嘅筷子,話係最代表到中國人,希望大家日日用筷子都記得自己係中國人嘅身份。嗯……咁有誠意嘅態度,Jenny諗大家一用筷子,唔只諗起個身份,仲會諗起李生你喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票