人生無常，一朝鯉躍龍門，是否就可安枕無憂？未必！失意官場有時反而可能樂得逍遙。咁啱今日「雙曾」就各自有新消息，仲要係幾兩極嘅消息。

「煲呔曾」做到最高位 輸咗人生

　　有「煲呔曾」之稱嘅前特首曾蔭權，可以話係香港回歸以嚟做咗最長時間嘅行政長官。之不過「煲呔曾」雖然做到香港嘅最高話事人，但係退休冇耐竟然畀人告，今年年初先啱啱被控「公職人員行為失當」罪名成立，入獄20個月，成為咗香港開埠以嚟被起訴而且被定罪嘅最高級官員。到而家件事都仲未完，因為佢仲有一條「行政長官收受利益」罪要再審，今日先喺高等法院正式開審，選咗9個陪審員出嚟，法官話預計要審25日。大家欲知後事如何，就要睇一個月之後嘅結果喇！

「鬍鬚曾」做唔到特首 焉知非福？

　　同樣姓曾，同樣做過財政司司長，又同樣參選過特首選舉，但係落選咗嘅前財政司司長曾俊華「鬍鬚曾」，雖然唔似得前老細「煲呔曾」咁做到特首，但係落敗之後反而生活更加多姿多彩，又拍片又做慈善，呢排仲踩過界做埋DJ添！事關今日有電台就喺社交網站上載咗條片，原來係宣傳「鬍鬚曾」將會主持佢哋嘅音樂節目！「鬍鬚曾」完咗選舉之後一直動作多多，瓣瓣都涉獵吓，玩吓Hea吓又一Day！

　　唉！睇返以往拍住上嘅「雙曾」，而家一個得咗但衰咗，一個衰咗但得咗，世事難料就係咁解！