林鄭未當選之前間唔中會落區親民，好多市民都話好想見佢一面，到佢當選咗，貴為特首日理萬機，市民大眾要見佢一面就難上加難。不過，今日佢就好「貼地」咁微服出巡，嚟咗書展同一班年輕人對話，話自己好鍾意行書展，以前兩個囝囝細嘅時候，差唔多每年都會來行書展㗎。不過，呢啲都係以前嘅事嚕，做咗官之後，對上一次嚟已經係三年前，仲要係為咗主持開幕咋！ 

林鄭一出現喺書展、即刻引來群眾簇擁，記者逼到變「柿餅」。

林鄭同你行書展 很想要吧?

　　Jenny噚日為咗睇實財委會，都冇時間去書展行下，今日同行家收到風林鄭會去書展打個轉，當然一早就去定會場靜候佢大駕光臨啦！林太今日應青協邀請同13個後生仔對談，真係十零歲嗰啲後生仔啊！ 唔係40幾歲嘅「青年」喇！

　　林太話好鍾意行書展，但對上一次嚟已經係三年前，仲要係為咗公務添，咁似乎唔夠「鍾意」噃？林太即刻解釋，話近年為咗公務，可以做自己鍾意嘅嘢嘅時間已經係近乎零，仲同Jenny呻，依家太多保鑣跟住佢，無晒私人空間喇！

以前愛瓊瑤、亦舒 而家日日睇研究書 

　　有人就趁機問佢，林太究竟有冇搭過公共交通工具呢 ？果然初生之犢不畏虎！呢一問，Jenny相信勾起咗唔少在場人士記憶中，林太嘟八達通嗰一幕……林太聽完都窒咗窒，笑住話以前未做行政長官嘅時候，每個星期都會有啲時間搭公共交通工具嘅，仲要大嗌「唔好講到我咁離地啦！」，但做咗特首之後，Jenny諗你肯，你班保鏢都唔會畀你搭啦。

　　林太就話其實以前佢都好鍾意睇公仔書同埋小說，例如瓊瑤、亦舒嗰啲佢都會睇，係咪好「貼地」呢？不過近年因為公務好繁忙，就少咗睇呢啲書喇。Jenny估而家林太睇嘅書應該99%係唔同部門Send過來嘅政策研究書，仲邊有時間睇小說吖！

「新書」《施政報告》未見影 「舊書」文宣頂住先

　　林太以勤力著稱，據聞記憶力亦過人，不過要佢記住點樣煮嘢食就似乎有啲難度。佢話自己對烹飪都有啲興趣，有一段時間屋企有好多烹飪書，因為睇烹飪節目會記唔晒啲食材，有烹飪書喺手就可以一次過睇晒啦！有同學仔就食住個勢問，唔知林太有冇整開甜品嘅呢?林太就話近排少食甜嘢啦，因為要睇住啲血糖，但都會整比囝囝食嘅。佢仲自爆舊年開始成日嚟唔切煮飯要叫外賣食，好彩屋企人尊重佢重視事業嘅決定，又對自己冇咩要求咁話。哎吔！Jenny覺得林太你學咁多烹飪又唔整畀屋企人食，嘥晒喇！

　　嚟到書展，點可以唔推介下有咩好「讀物」？林太就好尷尬咁攞出兩本佢自己嘅書，話想推薦畀各位年輕人，因為而家自己已經好少睇書啦，係睇都係睇返自己以前嘅書。首先係「絕版」嘅署長隨筆，另一本就係競選時嘅文宣。佢話書入面有自己以前對市民嘅承諾，好有參考價值，仲簽咗其中13本送畀在場嘅年輕人添！咁又係，林太你本「新書」《施政報告》要等到10月先出版，唔Sell「舊書」都冇咩嘢Sell。

賣開政治書嘅書商話，今年嘅銷情比起差過上年好多。

港人政治冷感變厭惡　《零八憲章》「爆冷」成暢銷書

　　講起Sell書，前幾年講中國政治嘅「禁書」十分Sell得，但呢兩年就算Sale都Sell唔去，連帶其他政治書都乏人問津。今年有賣開政治書嘅書商就話，今年嘅銷情比起上年差咗好多，比起上年同期差唔多少咗10%，次文化堂堂長彭志銘就話今年貿發局唔係好推銷到書展，有好多人今日先知道書展已經開幕，而且今年好少政治書出版，就算係最好賣嘅都已經係關於劉曉波嘅《零八憲章》，但係呢本都已經係2009年嘅舊書啦！

　　佢同Jenny呻，因為而家香港嘅政治氣氛好差，出版社又比紅色書商壟斷晒，作者出咗本書都冇地方可以賣’；二來係雨傘運動後香港人都冇晒心機，而且時局變得太快：「今日寫嘅嘢，聽日就Out咗啦！」佢又偷偷地同Jenny講，自從銅鑼灣書店事件之後，好多大陸人都唔敢落嚟香港買政治禁書，有好多從事政治禁書水貨生意嘅人都驚咗「洗頭艇」而金盆洗手啦！Jenny係佢嘅說話中都感受到淡淡的哀傷啊。

　　堂長好愁咁同Jenny講，其實對之後幾日嘅銷情都唔睇好㗎啦，因為而家嘅香港人由以前嘅政治冷感變咗兩派，一係就「我討厭政治」，一係就對政治失望或者好大無力感，依家有冇一啲話題性嘅作品面世，所以佢都睇得好悲觀！