聽日(12日)就係DSE放榜啦！應該有好多考生都好緊張，如果你有時間睇Jenny呢個欄，相信你都應該唔係今屆嘅考生喇；不過可能你嘅囝囝囡囡、親朋戚友都係今屆考生之一，Jenny先喺呢到祝咁多位應屆考生拎到心儀嘅成績！

楊潤雄率先預告去天水圍打氣

　　踏入放榜季節，Jenny都有種感慨，想當年自己都一樣抱住忐忑不安嘅心情行入學校拎高考放榜成績表，嗰時一介書生以為成績就係一切，但喺社會打滾咗咁多年，你就會明白一個公開試唔代表啲咩。Jenny見唔少人成績彪炳，做嘢就懶勁；有人分數平平，但表現精靈。所以話呢，人生仲有好多好精彩嘅嘢等緊你去發掘！好似小妹咁，因緣際會入咗傳媒，見識到一個外人唔知嘅大世界。

　　話說回來，新任教育局局長楊潤雄都知考生們好緊張，率先預告聽日會特登去到天水圍嘅香港管理專業協會羅桂祥中學為考生打打氣！呢間中學最出名就是校長作風開明，同埋好鼓勵學生就時事發表意見，所以無論黃色定藍色嘅家長同學生喺學校都有偈傾，揀呢間中學，係有啲背後含意嘅！

若林鄭玩快閃就夠晒驚喜

　　而今日林鄭就去咗母校嘉諾撒聖方濟各書院勉勵一眾師妹，加上今晚又要出席廣東社團總會嘅酒會，可能怕太攰，所以只好交楊生代勞遠征天水圍，以示對天水圍學子嘅重視，免得有人又借啲意話佢唔理新界西北居民，話晒楊生都係教育局阿頭呀嘛，山長水遠去到天水圍，齋係誠意Jenny都畀足100分！

　　至於林鄭聽日會唔會都同應屆考生打打氣？Jenny覺得一定會，小妹建議佢快閃出現喺各區學校，一於畀個Surprise同學仔，順道又可聽聽最真實「貼地」嘅少年心底夢。　

見真人不如見真金白銀

　　不過比起見到林鄭真人，Jenny估同學仔會更希望見到佢提出嗰個「教育新資源」嘅一系列措施「真身」喇！尤其是當中嗰項為達到入大學最低門檻（即俗稱3322）但又冇資助學位、要讀自資院校嘅同學仔，提供嘅每年3萬蚊資助。

　　如果呢個措施可以趕得切係今年財委會通過，就能夠幫同學仔提供更多元嘅出路，事關唔係人人都負擔得起自資院校咁貴嘅學費，有咗呢筆錢，嗰筆學債都唔使咁重皮，同學仔就可以更自由咁揀自己鍾意嘅科目嚟讀喇！Jenny從來都話，人生嘅選擇好多，唔需要理人地嘅目光㗎，際遇嘅嘢冇人講得埋，你睇我哋一眾官員同立法會議員就知道啦！