04/07/2017
林鄭行會成員大晒冷 搶先睇教育開支使去邊
今日林鄭開第一次咗行政會議,完會後行會成員仲齊齊「晒冷」,出嚟見記者添!林太話,今屆嘅行會成員各有自己嘅專業範疇,仲點名話陳智思、任志剛、史美倫、周松崗四位係自己嘅財金「四大支柱」,專心搞好佢套「理財新哲學」喎!既然「四大支柱」要睇住啲錢,咁陳茂波(波叔)要記住「應使則使」啦!加上,而家消息話行會已經通過咗50億元教育經常性開支,Jenny收到風,可以率先話畀大家知,啲錢使咗去邊。
成員大晒冷 勞福教育好唔得閒
林太話行會成員各有專業,未來會同唔同政策局多啲溝通,喺政策醞釀初期「收風」。好唔得閒嘅有勞福界代表,勞福局局長羅致光一上任就已經成為焦點,但除咗佢之外,其實行會新丁林正財都係專門搞社福嘢,加埋資方代表、被人叫「廿蚊張」嘅張宇人!前兩日林太話要再諗吓取消強積金對沖個方案,雖然唔會推倒重來,但睇嚟都有排搞喇!相信未來一段日子幾位都要係咁密密斟先得!
聽日林太就要出席今屆政府首個行政長官答問大會喇,佢一早就放風話要先搞好教育50億元經常性開支撥款,又話已經得到廣泛認同,唔知當中「教育界同命鴛鴦」李國章同羅范有冇出力呢?Jenny就覺得佢哋本身同教育界關係麻麻,唔出聲好過出啦!
林太話聽日新任教育局局長會同委員會、持份者等等解釋50億方案,所以今日唔可以講太詳細。其實,林太早已經向教育界詳細咁介紹咗個計劃,而家就等Jenny同大家率先披露聽日林鄭政策嘅「頭炮」內容啦!50億元嘅新增教育經費雖然叫「經常開支」,不過錢並唔係一次過就批晒出來,而係至少會分兩個階段。
分段畀錢增教席 自資課程有資助Take
林太好希望能夠喺7月立法會抖暑前搞掂撥款,咁9月新學年就可嗱嗱聲上馬。林太為咗可以順利通過,已經同唔同黨派打招呼,今次各黨派都支持,阻力唔大,可以話係上任好開始。
首先,中小學「班師比」(Class-teacher Ratio)增加0.1,估計共提供2500個常額職位。大家可能唔知咩叫增加「班師比」,據Jenny任職老師嘅朋友解釋,所謂「班師比」增加0.1,即每班增加0.1位教師。以一間有24班嘅學校為例,就即係會請多2.4個常額教師。
大專學生都有份受惠,皆因林太計劃資助符合條件入大學條件嘅學生,就讀自資院校學士學位課程學費,如果讀全日制經評審的本地或者非本地學士課程,包括銜接課程,都有3萬蚊學費資助,無需資產審查;如果返祖國讀呢?一樣有!只要係合資格課程就資助你5000大元。
中小學請SENCO 教育界讚好
另外,林太又覺得而家中小學特殊教育統籌主任(SENCO)試驗計劃效果都好理想,所以想將SENCO常規化,未來三年配合埋相關培訓之後,會逐步擴展至每間公營中、小學都請返個SENCO。而課程發展主任(APSM)呢個幫到唔少特殊學生嘅項目,亦擴展去到全部特殊學校,第時會幫39間特殊學校提供職業治療師、9間特殊學校提供言語治療師。仲會將原本住宿生先有嘅「醫療情況複雜」學生額外支援津貼,擴展至日校。
計埋計埋,上面各項計劃使費大約係每年30幾億,新嘅常額職位就有3200個。不過,幼兒教育方面同埋教師薪酬職級表,就未有明確落實時間表;但教育界都覺得今次可以「袋住先」咁話。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票