真係無驚喜就無驚嚇？林鄭新班子人選傳來傳去咁耐，今日終於開底牌。說起林鄭組班，她過去兩個幾月可謂被人餵檸檬餵到胃酸過多。正如佢自己都講過，驚七一唔齊人，驚到瞓唔著。依家雖然「齊腳」，仲同記者講現時個班子係「最理想班子」，但係就點都唔肯講少少物色局長的細節，心水清的人不多不少都感覺到佢有些委屈口難開。既然三司留任非林鄭所願，Jenny看來幾人同台時總是貌合神離，袁國強合照時仲面黑黑咁。

張雲正婉拒 林鄭認命留張建宗

　　眾所周知，公務員事務局局長張雲正是林鄭屬意升級做司長的首選，皆因張氏人緣好又有台型，符合晒林鄭「為新班子注入年輕新血」的期望，加上他在中央和政界之間備受賞識。

　　但張最終以照顧年邁母親為由婉拒，林鄭遂認命讓年屆67歲的張建宗留任。不過，Jenny 則聽聞張雲正拒絕升官，某程度是想保護其「八十後」的新聞主任(IO)女友。

　　張建宗得以留任當然開心，對於別人指新班子「二流」似乎忿忿不平，要為自己正名，強調係「容易交流」，真係信不信由你。

廚房太熱銀行大班齊耍手擰頭

　　財政司司長一職林鄭一開始應該最希望換人，皆因現任財爺陳茂波的「梁粉」味太重，民望又長期潛水。因此林鄭苦苦找尋各商界驕子出任財爺一職。

　　可惜，出任財爺一來年薪大減，二來廚房實在太熱，Jenny八到被林鄭看中的人選包括王冬勝、洪丕正及陳智思等都耍手擰頭。梁高美懿、查史美倫、馮婉眉等商界女強人亦表示無意加入政府。後期林鄭轉推薦信安亞洲區主席歐陽伯權出任財爺，但向中央游說時似乎失敗告終，中央仍然對陳茂波「疼愛有加」，「波叔」續任財爺無黐牙。

律政司司長乏人問津　袁國強焗留任

　　新班子中的律政司司長一職，據知乏人問津，先有報導指現任律政司司長袁國強本做了一屆司長後意興闌珊，加上健康理由打算請辭，本來林鄭希望由資深大律師鄭若驊出任律政司司長，為班子增添多一名女性，不過亦遭婉拒，其他傳聞中林鄭心儀人選還有莫樹聯、王鳴峰、譚允芝，皆表示無意從政。最後，袁國強經林鄭游說下將處理完高鐵一地兩檢後再離開，讓林鄭不至於「七一唔夠人宣誓」。

　　袁國強心底有幾唔想留低？或者可以從今日林鄭拉大隊見記者時睇得到，企響林鄭旁邊的袁國強全程板起塊面，到咗記者答問環節表情即刻寬容好多。