23/05/2019
【男友寶】返工被女同事激到嘔血!公司內部運作都要「男朋友」比意見…
討論區不時見到有姐妹分享同「媽寶」男友相處嘅痛苦經歷,令一眾女性一致認同情路上千祈唔好搵「裙腳仔」做終身伴侶,唔係你嘅日子將會十分可憐。伴侶你可以主動地揀,但同事你只可以被動地希望上司請個正正常常嘅人類返嚟就心滿意足。偏偏,香港地遍地寶貝,職場上遇到佢地,真係激到嘔血!
「男友寶」顧名思義,緊係個乜都聽男朋友話嘅女朋友喇。呢位女同事,日常生活不嬲都毫無主見,已經成日阻到大家。例如簡單如lunch食雞定牛,佢都會好多考慮,遲遲落唔到決定,又會因為男朋友講過「食牛多毒素」而糾結放棄自己想食嘅牛set。最終,因為男朋友平時要練肌肉食雞胸而跟隨男朋友口味。但我地一班同事就日日比佢煩住落唔到單,餓住要陪佢分析食牛同雞嘅好、壞。
你嘅個人選擇煩到人都算,唔想entertain你嘅同事會自動無視你,但工事上先係最頂佢唔順!成日係公司到開口埋口講男朋友讀咩U、有幾多條A、有幾聰明,所以乜都要聽佢講。係!我唔排除佢個人真係好Smart,但小姐你同你男朋友讀唔同科、從事唔同行業,佢未必及你咁清楚我地呢行嘅野,可唔可以唔好乜都「我男朋友話…」
「我男朋友話條數咁計唔岩,應該咁計先岩啊!」可唔可以唔好將個外行人講嘅野去challenge我地一班行內人嘅做法?你既然覺得成個行業一路以嚟嘅做法都係唔啱,不如你用你男朋友嘅方法做一次睇下係咪快、狠、準!成功嘅你應該可以出名,唔洗再打工。
「我男朋友話用A速遞咁貴好傻,建議我地用B速遞,慳返D錢分分鐘年尾BONUS大份D添。」多謝你咁為大家著想,有時公司選擇買D貴嘅service唔係傻,可能係因為要確保個service冇甩漏,甚至可能因為A速遞本身就係公司啲高層嘅,啲錢左手出完右手入返,有咩唔見得光嘅內在理由,唔通又要同你解釋咩?
情侶間互動與我地無關,你可以係女朋友面前懶醒,但最慘係你女朋友不停用你嘅無知去挑戰大家,真係好令人反感!有時仲要因為佢嘅提議或犹豫,累到大家係哂更多時間去解釋。最痛苦真係,而家一聽到佢開口講「我男朋」個人就無名起火。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇