近年港產片嘅票房慘淡，有幾多套港產電影你真係印象深刻？電影《志明與春嬌》貼地嘅題材令唔少香港人得到同感，收得唔錯票房後，再發展到開第二部以中、港為背景嘅《春嬌與志明》；再到上年，第三部我未睇嘅《春嬌救志明》，膚淺啲講句「淨係睇佢添食咗兩次就知佢票房唔錯，有賺錢空間！」。不過，其實我就唔係想評電影，只係因為《志明與春嬌》嘅情節，令我聯想起公司嘅荒謬。成日話香港人最適合做奴隸，其實中國人都不遑多讓！

　　《志明與春嬌》戲中志明同春嬌係因為「打邊爐」而認識，吸煙危害健康人人都知，但我全公司上下都係煙民，而且煙癮仲大過張志明！話說本人公司人事部近排換咗個中國籍高層，一坐低即刻炮製咗「十戒」俾我哋嘆。以下我精選左幾戒：

1. 嚴禁喺位食嘢，要食嘢躝去pantry匿埋食！

　　有時做嘢做到肚餓，想食少少嘢，莫講話下午茶，而家連塊消化餅我都要行去pantry先可以食。想偷懶唔行去pantry嘅，咪唯有成個小學生咁，偷偷地放入口。不過咁喎，俾人捉到你就要收warning，bonus扣幾個percent㗎啦！你話咁做係為左保持辦公室清潔？我就話其實HR心底裏係想隔離我哋呢啲要偷懶、又自甘墮落嘅垃圾員工，唔好俾我哋食嘢嘅香味，或懶散嘅態度影響到其他打緊仗嘅同事，你要自暴自棄係你嘅事！同時仲要俾人Label坐係Pantry果班就係廢人，有時覺得係咪就快餓到血糖低，都要跑去廁所食嘢。

2. 枱上除咗同工作有關嘅嘢，其他無關嘅垃圾收埋佢！

　　HR領導覺得，返工就返工，放咁多無謂裝飾係枱只會阻礙工作、影響效率！所以，講到明如果夜晚突擊查位後（係呀，會等人走晒夜晚突擊查位，係咪好變態），發現任何同工作無關物品，會收起一包，自己第二日再去HR排隊認領返！你話想擺屋企人嘅相去激勵自己俾心機做嘢？唔得！因為你個心應該係屬於公司嘅，唔可以諗住其他人，而公司老闆放在心上就得啦，唔使下下攞出嚟講嘅屎忽鬼！

　　寫到呢度先發現，原本想講嘅「公司迫我哋全民食煙」呢個離譜HR政策都未開始講，就已經忍唔住連爆咗兩項傻仔政策。有關食煙嘅癲事，下星期再講點解連張志明都唔夠我哋「抽」。