喺香港，「性」一向都被教育為禁忌嘅話題。出到社會做嘢，就算「性態度」變得比細個開放，都唔會同同事互談性事。但係點解大家咁避忌呢個話題嘅同時，我哋仲可以知道高層們嘅「性能力」異於常人呢？全靠三個字：「打飛機」！

　　呢度提到嘅「打飛機」，當然唔係性行為嗰種「打飛機」啦，而係「自我感覺良好，以自吹自擂嘅言論追求自我陶醉」嘅行為。而我發現公司之中，愈高層嘅上司，「打飛機」技術就愈高、持久力就愈耐！相反，公司薯仔莫講話「打飛機」，根本係公司範圍內想維持興奮狀態都有困難。都係嘅，「打飛機」呢啲咁奢侈嘅行為，低下薯仔又點可以加入一齊爽呢？最多都係參與活動，準備一套套 「AV」畀高層享受。

　　講白啲，薯仔準備嘅 「AV」咪其實啫係負責嘅project囉！曾經有一個project，大腦細認為idea無聊加無用，一口拒絕批budget畀有關部門使用。不過唔好以為冇budget就唔洗做！冇budget你就唔做嘢嘅話，曝光率就愈嚟愈低，大腦細慢慢就會忘記你呢個部門，然後喺有日要節流嘅時候就會向大家開刀。所以現今嘅打工仔已經進化到，冇錢都要你做呀。為三餐，同事唯有頂硬上，做啦。最終，零成本之下，出嚟嘅project都得到唔錯嘅成效。

　　腦細見狀，緊係即刻把握時間去爽啦。Project出世後，佢即刻嗱嗱聲做定唔同種類嘅report同PowerPoint。先係小薯內部會中不停小讚大家，及大讚全靠自己鼎力支持薯仔們。再召集各department大佬，不斷向眾人洗腦，呢個“no cost, high value”嘅方法先可以迫出大家嘅小宇宙，共創佳績。由下以上，最後緊係去大腦細面前認叻喇…

　　「而家我哋唔洗用公司一分錢，都可以做出成績。」

　　「哦，幾好吖，咁以後唔洗批咁多budget畀你哋。」

　　反正以後都係冇錢用，內部「機」又打到冇對象可以打，一於「野外露出」下！即係用呢個零 cost嘅小Project出去參加比賽，同其他有錢得嚟範範專業、認知度又高嘅project鬥！唔只參加比賽，老闆仲用呢個「神奇」project出席各大企業sharing，將大家嘅神績捧到天上有地下無！其實project lead同一班小薯就覺得好失禮，成績係唔錯，但未至於可以拎出枱面同大家分享，甚至賣花讚花香咁同人鬥，真係羞家。呢架飛機已經運行咗半年，睇嚟長打長有，難為一班小薯畀其他行家笑到面黃。