30/11/2017
【真心打冷震】當前線同事發嗲功,坐back office嘅同事……
話說,公司業務除咗有日日朝9晚5坐辦公室嘅back office,亦有直接出去做生意嘅前線sales員工。平時前線同事見到我地著到身光頸靚、日日坐喺office度歎冷氣、又唔洗受客仔嘅氣,不知幾羨慕;而我哋當然覺得前線同事唔洗好似動物園入面啲動物咁,日日畀人困住喺辦公室,辦公時間可以唔使排長龍去銀行,而且多勞多得,真係free過學生時期!不過,最近就發生左件事,聽到我哋一班back ofice嘅同事打晒冷震!
話說公司業務擁有實體店,日常所有店舖開支,都會交由坐office嘅會計部同事核數及批錢。一日,會計部同事認為一項值$1500,名為「penalty」嘅支出十分可疑,所以就向店舖經理查詢。點知得到嘅回覆喺:「GM話唔使理咁多,照出數就得喇!」嘩!一句撻埋嚟就GM,作為一個專業又小氣嘅公司會計,梗係會捐窿捐啦,用盡自己方法去尋求呢$1500支出嘅來龍去脈啦!我哋一班坐office同事,聽到前線部門可以失驚無神多$1500,而我哋冇,又梗係同心協力,用盡身邊人脈去查明真相啦!辦公室又點會有秘密呢?唔使兩日已經水落石出!
為咗了解每日舖面嘅營運,GM同一班前線同事,包括店舖經理都會有個whatsapp group。平時呢啲group冇乜必要,真喺唔會出聲。但有日,一個頭像係「歎住英式三層afternoon tea」嘅年輕少女突然喺group度錄起voice message:
「經理啊~我今日好慘啊~畀人罰左$1500啊!個垃圾筒咁遠,我唔夠力,咪拉袋垃圾去垃圾桶附近囉,點知咁就畀人罰左錢啦!嗚⋯…」(台妹式嗲聲)
「邊個叫你咁懶豬,行多兩步都唔肯!仲有啊,你掉都趁冇人係附近先掉吖嘛!邊會咁蠢豬㗎!」(GM用一把前所未有咁溫柔但又令人不寒而慄嘅聲調回覆)
「有啊!我有聽你話睇左㗎啦!佢地著便服㗎!我都唔知佢地係食環,咁就罰左$1500啦⋯⋯唔~」
「算啦!今次原諒你啦!嗰$1500公司數claim返啦!」
聽畢,我哋一班八婆仔齊齊望向GM間房,公司冷氣凍還凍,都唔及手機voice message所發出嘅冷溫度得以令人打冷震。有時,人哋得到但自己冇嘅野,真係要睇清楚自己有冇能力去爭取。呢刻,會計同事冇再追問,頭也不回咁批左條數。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】本港無人駕駛自動車最快本月底試運,你會否乘坐?► 立即投票