今年57歲嘅人貝索斯喺1994年創立亞馬遜，成功令呢間公司成為市值1﹒77萬億美金嘅美國電商龍頭。而佢噚晚（5日）正式卸任CEO一職，轉而將重心放喺太空事業嘅發展度。喺呢27年入邊，佢成就係無可否定嘅，雖然佢喺員工眼中未必係好老闆，但依然提供咗唔少管理哲學畀大家參考。

亞馬遜喺車庫誕生，依家貝索斯喺世界首富

（shutterstock圖片）

　　亞馬遜係喺貝索斯嘅西雅圖屋企車庫誕生，最初由網購圖書開始做起，公司發展得好快，之後開始擴大業務範圍，由玩具、工具到其它商品一應俱全，仲向零售商開放交易平台。依家亞馬遜喺零售、雲計算、智能設備、電影製作甚至時尚品牌等領域嘅業務規模可觀。數據顯示，由1995年到2020年，亞馬遜嘅销售額增長咗77﹒2萬倍，高達3860億美金，差唔多等於成個阿根廷嘅GDP。公司僱員超過130萬人，係僅次於Ｗalmart嘅全美第二大僱主。

　　至於佢本人就當然fat fat啦，按《褔布斯全球富豪榜》實時數據，「貝索斯係全世界最有錢嘅人，身家達１９１４億美金」。

貝索斯不受員工好評，將好員工榨乾

貝索斯將同美國運輸安全委員會第一位女性航空安全調查員Wally Funk（圖右）飛上太空。（jeffbezos IG截圖）

　　但係喺員工眼中，老細多數係衰人。喺2014年德國柏林第三屆國際工會聯盟度，嚟自161個國家逾1500名工會代表推舉貝索斯做全球最差老闆。一個亞馬遜員工仲講，如果表現得唔好，貝索斯會將員工「撕碎」；如果做得好，就會做死員工為止，認真跨張。

　　今個月20號，佢計劃乘坐自己創辦嘅私人太空公司Blue Origin製造嘅第一架載人飛機上太空。「但係有15萬人聯署叫佢上咗太空唔好落番嚟」。

　　貝索斯自己都承認，亞馬遜係一個相當高壓嘅工作環境，不過就唔覺得有問題喎。佢喺2016年致股東信寫明，呢樣文化就係亞馬遜，而且喺過去20幾年，亦吸引咗一班志同道合嘅同伴。佢認為，企業文化係由過去嘅成敗慢慢形成，重要嘅係認可呢啲歷史，並捍衛佢。

　　貝索斯嘅管理哲學之一係聆聽批評，如果人哋講得啱，就要即刻去改善。不過都唔好令自己太受外間批評影響，如果過分在意的話，好難成為一名帶領創新嘅人。

亞馬遜新任CEO Andy Jassy。（shutterstock圖片）

　　貝索斯聲稱亞馬遜正處創新能力嘅高峰，正係交接嘅最佳時機，卸任CEO後，依然係公司嘅最大股東兼執行董事長，繼續喺公司保有話語權。至於接任嘅係現年53歲，服務亞馬遜24年嘅Andy Jassy，最大嘅成係建構咗龐大嘅AWS雲計算業務。前人嘅功績實在太過厲害，要追平甚至超越相信唔係易事，值得好好觀察。

撰文：吳藹林