美國大選開始進入最後直路，候選人都去緊啲搖擺州份拉票，但突然就傳出民主黨候選人拜登個仔亨特涉嫌收受利益，而且有指拜登都涉嫌貪污埋一份，之前民調都顯示拜登支持度超前侵侵（特朗普），唔通選戰結果有機會再變？

(Shutterstock圖片)

亨特與中資企業關係密切，何志平也捲入

(Shutterstock圖片)

　　繼2016年希拉里「電郵門」後，今次嘅主角就到亨特，據《紐約郵報》曝光嘅電郵，內容顯示出亨特同中資企業時任華信能源董事長葉簡明互有來往，而且葉氏想邀請亨特做能源顧問，並會支付百萬美元報酬；而另一份文件就顯示本港民政事務局前局長何志平曾以中華能源基金會秘書長的身份，向亨特支付100萬美元的顧問費，作為提供法律建議嘅報酬。

　　盡管《紐郵》聲稱，呢啲來自棄置電腦嘅「Email」真假難辨，但侵侵聽到呢個消息梗係搵位入啦！係北卡羅萊納州的造勢活動上，侵侵起勢批評拜登父子腐敗，甚至背叛美國、犧牲全美工作機會。我就覺得侵侵好似吹大咗小小啦，不過大家都熟悉侵侵說話風格，慣㗎啦！　

班農派你唔死踩多腳，亨特律師千方百計想拎返部腦

(Shutterstock圖片)

　　選戰下，對手梗係趁你病踩多幾腳，好似侵侵前顧問、前白宮首席策略師班農接受訪問時候表示，媒體所講有關於亨特嘅內容珍珠都無咁真，又話拜登係一個「石頭般冰冷的撒謊者」，而且亨特嘅律師曾經想千方百計拎返個電腦硬碟，已經先後連絡過電腦維修店。正所謂「人類總要重複同樣的錯誤」，過往因為電腦外洩問題引起嘅醜聞真係有排數，咁緊要嘅嘢點可以隨便搵間電腦鋪整呢？

　　不過，有指FBI調查緊，呢份所謂「電郵來往」紀錄，係咪俄羅斯企圖散播假訊息，從而影響選情，不過班農實牙實齒咁話：「邊到有咁多俄羅斯情報，佢地承認個啲就係佢地嘅電腦硬盤，呢啲都係拜登過去幾年來一直向美國人講大話嘅證據。」

烏克蘭議員爆第二部電腦，懷疑藏有拜登家族罪證

(Shutterstock圖片)

　　災難永遠都係接二連三爆發，有美國傳媒又爆料，引述烏克蘭一名國會議員嘅消息指，當地執法部門已經扣押一部屬於亨特嘅烏克蘭業務聯絡人手提電腦，有傳呢部手提電腦有齊拜登家族貪污嘅貪物證據，其中包括天然氣集團Burisma嘅相關利益證據，而呢部電腦已經係當地執法部門手上，預備係刑事訴訟案上「爆料」。值得一提嘅係，呢位國會議員早前被美國財政部稱為「活躍的俄羅斯特工」。

　　雖然大家目前都係食緊花生嘅狀態，但又咁講，係預備投票前夕，拜登嘅醜聞接二連三咁大爆特爆，只能話選戰永遠都係最黑暗，你永遠都唔知對家手持咩牌反擊；之前侵侵因為總統辯論表現極差而引致支持率下降，但對家突然醜聞大爆發，唔知拜登有無王牌係手呢？

撰文：李皆穎