想爆侵侵（特朗普）大鑊嘅人真係一浪接一浪，呢次就輪到自己個親姪女瑪麗（Mary Trump）。Mary將佢對侵侵所知，同埋屋企人嘅口述集結成書，喺噚日（14日）正式出爐。查實Mary出書之前都被屋企人出禁制令，限制過佢出版！點解明明係一家人，又要搞到爆大鑊又要對簿公堂呢？

 
兩家人原來有牙齒印，姪女嬲到新書要提早出版？

本書用埋侵侵做封面，真係打正旗號（網上圖片）

　　正所謂「沒有無緣無故的恨」，個姪女點解會出書爆個親叔叔嘅黑歷史呢？原來當年Mary個爸爸，曾經幫爺爺佛瑞得．特朗普（Fred Trump Sr﹒）做房地產，不過表現唔好被人趕走；到Mary阿爸因為心臟病入醫院逝世前後，家族其他成員都無人去探下佢，而侵侵當時仲走咗去睇戲添。

　　含住泡怨氣，加上Mary覺得，近呢幾年美國咁亂都係由呢位親叔叔所引起，所以先打算出書爆大鑊。雖然呢次出版曾經被特朗普家族透過法院出限制令禁止，不過法院話唔受影響照出可也！最後，本書更提早兩個禮拜，即係噚日（14日）出爐添。

批評侵侵傲慢無知，當年靠出貓考入賓州大學

好似都幾難考入去，不過請槍又唔同講法（Shutterstock圖片)

　　新書《太過分了而且沒完沒了：我的家族如何造就這個全世界最危險的人物》（Too Much and Never Enough：How My Family Created the World's Most Dangerous Man）一聽個名就知道到架勢堂，Mary根據自己嘅回憶同其他家族成員嘅口述內容，編寫成一本240頁書，其中一行講到：

　　「喺侵侵成長過程中，被培育出一種扭曲的行為，而且佢已經將『講大話』融入喺生活當中。」

　　之後佢喺書中大爆，侵侵喺高中時候，已經畀錢搵「槍手」幫手代考入學試，最後先會入到賓夕凡尼亞州大學嘅華頓商學院。白宮已經出聲明否認考試作弊，而發言人更指出呢本書係「謊話連篇」；誰是誰非，真係口同鼻講啦。

指侵侵同老豆關係麻麻，而且係自戀狂

（Shutterstock圖片)

　　談論到屋企關係，白宮澄清指侵侵同老豆關係溫暖，而且佢又對老豆好好；但呢位擁有博士學位嘅姪女，卻爆出另一個版本：

　　「原本爺爺對我阿爸好嚴苛，希望佢可以接手盤生意，但我爸只想做飛行員，所以盤生意先畀侵侵；不過1980年代侵侵搞到盤生意損手爛腳，所以先迫到我阿爺出手，因此佢兩個關係並不融洽。」

　　Mary覺得侵侵雖然望落去係一個巨人咁，其實只不過掩飾緊佢嘅軟弱同自我，有時候喺佢身上甚至散發住一個自戀狂嘅特徵。Mary話，自己原本唔想搞咁多事，不過睇到佢上任做總統已經傷害咗好多人，所以想透過呢本書將佢拉下馬。

　　各位，花生殼真係剝到一地都係，我地都係坐定定睇戲啦！

撰文：李皆穎