呢次新冠病毒疫情，美國真係好大鑊，而侵侵（特朗普）就將矛頭直指中國，喺上星期佢就咁講過：

「呢次疫情係美國最差嘅一次「被襲」，衰過珍珠港事件同911，從來都未試過咁嘅事！本應可以一早阻止，喺中國爆發時候就應該阻止，但中國無做過。」（shutterstock圖片)

　　其實911受襲同珍珠港事件，兩件事夾埋死咗5000人，但對於美國嘅傷害真係幾代人都不能忘記。另外，美國經濟真係苦過苦瓜，1月失業率講緊重喺3.4%，4月已經跳到去14.7%，都唔好計之前美股經歷四次「熔斷」，而且重有2600幾萬人要申請失業救濟金，真係慘慘豬囉！

　　正所謂「選舉臨近了」，侵侵諉過中國；而作為對家民主黨又點會放過攻擊對手嘅機會呢？就喺呢個時候，唔點解前任美國總統奧巴馬又會有段錄音流出：

「就算做到最好嘅政府都可以好差，如果用「我有咩著數」、「等其他人見下鬼」嘅心態係政府運作中作崇，就係一個絶對混亂嘅災難。」（shutterstock圖片)

　　奧巴馬呢次打算搵疫情做攻擊點，打算為民主黨出返口氣，點知侵侵又唔抵得，立即係Twitter上面反擊：

「捉到佢啦！奧巴馬門！（OBAMAGATE）」

「美國目前為止最大嘅政治罪！」

　　其實侵侵聽到奧巴馬話自己處理疫情係「災難級」，所以佢引用其他人嘅發言攻擊返奧巴馬，包括暗示奧巴馬喺卸任之後就開始攻擊現任政府，係美國歷史上係未發生過，真係好鬼死小器！

　　睇怕呢場口水戰將會延續至選舉完結，但睇落啲對話都幾「小學雞」咁囉！