仲有唔夠三周就到立法會選舉日子，但唔知各位讀者有無覺得，今屆選舉氣氛的確唔係幾熱；雖然係多咗好多不同團體參選，但比起以往單純泛民同建制對決，反而令到焦點更加分散，亦令到整個選舉氣氛無咁熱鬧。

　　九龍西係其中一個變化最小嘅選區之一。議席數目由上屆五席，加多一席去到六席。由於上屆當選嘅五個議員都繼續選，而佢哋嘅支持度又無乜大變化，預計都「坐定笠六」，令到焦點變成為最後一席。

　　一般分析，最後一席無非都係由三家非建制去撕殺，包括上屆僅僅輸4000票畀經民聯梁美芬而入唔到立法會嘅民協譚國僑，仲有新思維狄志遠以及獲得梁天琦力撐嘅青年新政游蕙禎。而喺已經舉行嘅選舉論壇之中，大家都見到曝光率最高嘅算係游蕙禎同埋狄志遠，所有非建制參選隊伍都集中「招呼」佢兩位，捧打出頭鳥，希望壓到佢兩個而取得九西末席。

　　譚國僑就勝在地區工作紮實，有多年擁躉，上屆僅僅輸畀梁美芬，今屆保到基本盤的話入局條件唔差。游蕙禎就新人新希望，上年區議會選舉佢同梁美芬兩個BB互撼，芬姐雖然薑係老嘅辣而贏咗，但游就賺咗人氣，唔可以睇低。最睇唔透就係狄志遠，呢位老泛民究竟係唔係得到阿爺關照，甚至如有啲報道話可能會有建制派過票畀佢務求拉游蕙禎落馬，真係最摸唔清狄志遠個底有幾遠。

　　但有建制中人就話，經過幾個論壇，反而唔可以計漏小麗老師之稱嘅劉小麗，喺論壇上面縱然做唔到焦點，但佢辯解能力強，都吸引唔少選民留意，話唔定殺到一條血路。

＊編者按：2016年立法會選舉，九龍西選區候選名單包括：譚國僑、梁美芬、狄志遠、游蕙禎、黃碧雲、劉小麗、蔣麗芸、李泳漢、朱韶洪、毛孟靜、黃毓民、何志光、關新偉、林依麗、吳文遠。