記起童年時，商場都會有些傳統手工藝美食，如龍鬚糖，花生糯米糍等等。每次見售貨員在飯煲內用筷子挑出一大舊粉糰放進一堆花生碎內，用較剪一邊剪出一粒粒的粉糰，另外一邊用筷子拌勻粉糰，就成為一粒粒好好味道的花生糯米糍。時至今日，要找到這些傳統美食都好難，想食又可以點？ 

　　不如就等韋太來教大家啦 ! 家長們還可以趁復活假期，與囝囡一齊作親子活動啦 ! 

烹煮時間：30 分鐘

份量：20粒

材料：

糯米粉   120 克

粟粉      30 克

砂糖      30 克

清水     200 毫升

菜油      1茶匙

餡料：

已烘花生     40克

砂糖         30 克

做法：

　　1. 花生放入乾磨攪拌機內打碎，與砂糖拌勻，備用。

　　2. 將材料順序加入盆內拌勻，放在已掃油的不繡鋼碟上，放入鑊內大火蒸20分鐘。

　　3. 蒸完用筷子插入粉糰內，如無粉糰黐住筷子，即代表粉糰已蒸熟。

　　4. 蒸好的粉糰放入已塗油的保鮮袋內，搓揉粉糰2－3分鐘。膠袋剪一小孔。

　　5. 準備花生餡料在碟上，用原袋唧出粉糰，滾上花生碎，即成。

小貼士：

　　1）如想麻糬更香滑，可以將清水改用牛奶。

　　2）餡料可改用黑芝麻粉或其他都可以。

　　3）用保鮮袋去唧出粉糰，方便又不沾手，如粉糰太大粒，又可以用筷子分割開。