傳統中國人坐月禁忌多，以前媽媽成日話，女人生完調補得唔好，日後到老你就知...

　　當自己做咗人媽媽生產完之後，真係發覺身體的變化很大，尤其係生完之後，有頭風痛，那時就知道為何婦女生產完一定要驅風及調理身體。

　　以前有媽媽及奶奶那一代照顧，自己識唔識唔緊要，但當兒子長大成人後，自己有可能成為人家的奶奶，無理由唔識去照顧家嫂掛? 

　　雖然，坐月食療係要知道產婦的身體狀況才去調理或進補，但基本簡單的食療學幾道都會隨時用得著。

　　韋太會一連六輯介紹幾道不同菜色，除咗適合產後婦女食用，女士們都適合秋冬進補，增加身體能量，健脾補血。

　　今期教授的鹽香雞紅米飯，產婦可以做用雞肉最幼滑的部份，餘下的部份用來煮雞酒或煲雞湯都可以。紅米纖維含量高，可以預防產後便秘。

烹煮時間: 45分鐘

份量: 1-2人

適合: 產後12朝食用

材料:

　　白米3/4 杯、紅米1/4 杯、光雞半隻、薑片2片

醃雞調味料:

　　幼鹽1-2茶匙、紹酒 1茶匙

做法：

　　1. 光雞洗淨抹乾，起出雞脾及雞翼 (餘下的雞肉可以用來煲湯)，將紹酒平均抹在雞脾及雞翼上，然後將鹽搽上，放入雪櫃醃3-4小時或醃一晚。

　　2. 薑片切成幼粒薑米，備用。

　　3. 白米及紅米混合洗淨，加入大約1比1點2的水及薑米拌勻，放入電飯煲內煮滾或放瓦煲內煮，然後將雞脾及雞翼放在飯面煮至飯熟，關火後再焗15分鐘，雞斬件享用。

韋太小貼士:

　　1、產婦進食適量紅米，有助增加纖維攝取量，防止產後便秘，令排便暢通。

　　2、餘下的雞肉可以用來煲雞湯或煮雞酒都可以。