最近公司傳來任職1x年的G「遞辭職信」的消息，不是不震撼的。畢竟「熬」了1x年，要離開，談何容易？他一句「佢無留我」，旋即將自己踩進萬劫不復的深淵。遞得信，就不要抱著「話唔定公司會留我呢」的天真假設，因為事實大概會證明「你諗多咗囉」。（後來才知道，原來遞信歸遞信，遞信不一定是要辭職。）

　　據小弟非正式且毫無法律基礎的「不合法」統計，任職滿2年至7年的員工跳槽「動力」最大；做滿10年或以上者，一般抱著「唔捱都捱咗咁耐，去得邊啫」的心態，往往會繼續「堅持」或「耽誤」下去，好難走得甩。當然，「好難」不代表「唔可以」。

　　小弟職責所在，循例要跟G見個面。「如何？」我單刀直入，同時避免帶有任何感情成分，以免捉錯用神。

　　「你唔使留我喇。」萬語千言，G只吐出這「重中之重」的6字廢話，出賣了他想公司挽留他的卑微願望。說到底，打工仔辭職一刻，還是想被挽留的，作為出生入死多年的豬肉獎。他黯然再說︰「佢（老闆）留都無留我。」畫公仔畫出腸來了。我就奇怪，既然有遞信的決心，怎麼卻沒有真正劈炮的勇氣。

　　我不忍心告訴一畢業便效忠公司，一做就做了1x年的純情的G，一般企業是不會流露出「無咗你唔得」的弱者姿態的。而為了進一步營造出「你要走係你嘅損失」的強勢，G才遞信，公司就霹靂啪嘞請了幾名新仔回來，「你睇，你啲嘢幾個小朋友就handle到」。

　　麻甩佬不宜說太多「天下無不散之筵席」的婆媽廢話。我一邊跟他握手，一邊官腔交代︰「呢兩星期陸續會有人返工，接手你手頭上嘅工作，麻煩你帶一帶班新人。你嘅豐富經驗，對公司嚟講真係一項好寶貴嘅資產。」

　　美國財經雜誌《福布斯》一項研究指，一世「做死」一份工的打工仔，隨時較每2年轉一次工的人少賺50%。要搲升職加人工，還是靠「正途」吧。

　　連隨一句「All the Best！」毫不留情地粉碎G不設實際的粉紅色的遐想，示意「你早日搵住好人家」，是我可以給予的最殘酷的慈悲。

　　原文刊載於ctgoodjobs.hk