一場迷你倉大火，一燒就燒了近五日，兩位消防員先後殉職，作為港人，心感悲痛。烈焰過後，除了提醒大家舊工廈的消防安全問題，還提醒大家，原來香港仲有演藝界架喎！ 

　　正當大火撲熄之際，「香港演藝界」星期日下午召開記者會，號召市民當晚在facebook一齊用一張白紙，寫上「#向前線消防員致敬」，然後一手舉起白紙，一手攞住手機電筒，自拍up上facebook呃like（呢個冇講出口，因為係客觀效果）。呢種做法喺深圳河以北嘅網絡世界不時出現，最著名嘅一次就係舊年「習近平黨爭勝利大閱兵」， 一大批活躍於微博嘅「中國香港藝人」響應網上呼籲，上載一張敬禮自拍，「向老兵致敬」。

　　啲人成日問中港矛盾點樣解決，我覺得我已經搵到問題嘅核心。你只要說服到香港人接受以上呢種做法，好多問題都可以解決。香港人一直都係比較斂於直白表露情感，唔少務實嘅人，見到有人好坦率咁將自己對某件事物嘅愛意或者敬意宣揚，都要預備定一個個嘔吐袋，費事嘔到周地都係。但隔一條河就唔同啦，好直率嘅，好坦盪盪嘅，尤其是到有災難發生嗰時，萬千群眾都會為咗救災隊伍而喝采。

　　你可以令到香港人睇到呢啲嘢唔嘔嘅，香港政府應該要頒徽章俾你。但係喺大家未做到呢樣嘢之前，就唔好怪香港人，見到演藝界咁做，想嘔。

　　寫紙自拍放上網呢個行為，從根本而言就會令人討厭。你致敬就致敬，做乜要放大你自己個頭話俾我聽你向人哋致敬？呢種「報到式」嘅致敬，除咗達到個人宣傳效果之外，就什麼都沒有剩下來，同啲區議員喺火場影相，或者火災過後送個果籃俾個消防區長嗰啲冇咩分別。更加顯示呢件事背後嗰種「集體性」，係要盲目聽從公司指示。

　　唔係唔俾你咁做，而係請你哋睇清楚你哋喺香港社會，仲剩返幾多號召力？環觀當晚網上嘅反應，除咗啲「明星」自high之外，我冇見到任何一個平民百姓有跟住做，點解呢？

　　呢個問題要講返轉頭，其實香港仲有冇演藝界呢？定還是已經喺多年嘅溶化同結合之後，變成「中國香港演藝圈」？呢班藝人近年出現嘅地點，係喺微博。對香港社會，佢哋不聞不問，彷彿已經唔存在喺香港呢個社會上面咁樣。當呢件事掂唔到政治啦，就跟隨大隊集體式行動，話俾人聽「嗱，我重存在架。」咁如果繼續問你，消防員待遇呢？點避免同類事件再發生呢？「演藝界」就會回歸花瓶角色。已經唔係要求呢班「藝人」要每件事都盡抒己見，但起碼對呢個圈子發生嘅事，唔會粒聲都唔出。何韻詩事件，就係最好嘅「照妖鏡」。

　　香港社會而家並唔係咁運作。民間本身已經有自發募捐，為殉職消防員家屬籌款渡過難關。社會討論亦都轉移去點樣杜絕同樣事情再次發生。

　　所謂「致敬」，只係一群為咗爭取曝光嘅人，一種最廉價嘅行動。除咗「多謝」之外，我哋重要諗點樣可以唔使不停「致敬」，因為當一個個人為我哋犧牲，其實我哋係欠佢哋一句「對唔住」。