人的大腦佔人的質量大約只有2％，但根據研究，耗用嘅能量大約係所有器官嘅20%。呢排我聽到有人話為咗節省人體嘅能源消耗，將自己個腦切走咗，剩返個頭殻攞嚟擺空氣，佢話咁就可以用少啲能量，個人又少啲負擔啦。你冇見過咩？我見過，我真係見過，嗰個人姓鍾，喺柴灣返工。不過佢切走嘅，唔係人腦，係一間報社嘅大腦。

      鍾先生喺上星期三凌晨時分，切走咗明報嘅大腦——執行總編輯姜國元（安裕），不明不白、極度憤怒、要求交代，係明報員工得悉消息之後嘅反應，呢個決定亦都喺傳媒界留低一個個問號。呢個大腦非同凡響，喺報界默默工作多年，係《星期日明報》嘅領軍人物，贏盡行內聲譽，但係同鍾先生就行唔同作風，過去鍾先生運用總編輯權力漏夜改頭條，據知姜國元都有力抗上司命令，抵抗作為報人認為不合理嘅審查，但係呢一次，可能係最後一次嘅抵抗，因為喺姜國元被炒嘅同一日，明報頭版列出一堆富豪政客嘅肖像，佢哋捲入《巴拿馬文件》風波。

      鍾先生當日見員工，話因為公司要開源節流，仲話自己都隨時預備好要被裁走，只係計過條數，最後都係決定炒姜國元，而唔炒自己。商業機構，面對經濟大氣候日漸衰落，想好天收埋落雨柴尚算人之常情，夠惡嘅，係連一個正常嘅交代都唔需要交出添，但係你裁得走個大腦，而且係喺你自己連間公司一個小腦都唔算係嘅時候，掹得個大腦走，就要預咗整個軀體其他部位有排斥反應囉。

      《巴拿馬文件》頭條係咪炒人嘅導火線？冇人能夠證實，明報職工會亦都冇。但係明報員工亦都反向證明咗，公司炒人唔係因為開源節流，其一就係鍾天祥先生又試漏夜叫停出版，因為想封咗專欄位嘅天窗，七位數至八位數嘅金額，就咁掟咗落鹹水海，呢樣就唔使節流？其二係明報職工會向資方提出所有人減部份薪金，換取資方請返姜國元，但資方無動於衷。其實都明白晒啦！

      同兩年前將劉進圖調職嘅套路好類似，不明不白咁將個大腦換咗，然後激起明報員工嘅排斥反應，等一排件事丟淡，又再向公司裡面唔聽話嘅人落手，不斷循環，其實係好無力，亦都好多人冷嘲熱諷明報員工唔將行動升級到癱瘓明報，但係對於大陸資金嚟講，佢著緊嘅相信唔會係份報紙停產賣唔到錢，而係冇咗呢個輿論平台俾佢哋宣傳，換走大腦俾個下馬威你哋先。但係有冇屈服到呢？明報員工係咪外界所講咁不思長進、冇實質行動呢？我諗呢幾日明報人就基建等各樣調查報道，俾到大家一個有希望嘅答案。

      話分兩頭，歷史同我哋開咗個小玩笑（雖然一啲都唔好笑）。「宋末三傑」之一的文天祥，當年力抗元軍壓境，誓保南宋江山，最後未竟全功，被元軍俘虜，忽必烈攻克中原，宋朝滅亡。忽必烈愛才，多次向文天祥勸降，仲叫埋啲叔伯兄弟一齊去勸降，重話要俾個官佢做，「一係揀做官，一係揀做鬼」，文天祥無動於衷，最後捨身成仁，被忽必烈處死，文天祥死於「元國」之下，後世傳誦為忠烈嘅典範。

      如今，此天祥不同彼天祥，鍾天祥下令裁走「得力助手」「國元」，完全角色身份名稱位置互換，也正正諷刺至極。這個不義的天祥，也終將與文天祥的名聲，走南轅北轍嘅路。而姜國元唔係捨身就義咁誇張，係冇咗份工，但係佢一直捍衞新聞自由嘅行動，令佢嘅報人生涯可昭日月，對得住「明」呢個字。

      至於嗰啲一路讉責記者，一路口噏噏支持新聞自由嘅人，就「司馬昭之心，路人皆見」啦！