05/02/2015
公屋有如細價股
四叔早已打晒開口牌,告訴大家買股好過買樓,近日再預示樓市年底見頂;超人兩年不投地,亦不再叫大家量力而為買樓自住,堂堂一線地產商,只係應酬式投塊深水埗市建局地仔,狂掃海外具穩定現金流的公用類資產。大孖沙的往績已告訴我們,就算唔信大孖沙把口、都要信佢哋對手,真金白銀手影動作最實際,論對樓市的觸角,又有誰及得上甚至敢與大孖沙對賭!
身邊一位手持優質住宅、寫字樓與地舖物業皆於沙士與金融海嘯購入、善於轉角市撈底的投資高手,已在加緊積極放售所持磚頭資產,準備把資金轉移海外,縱然眼前樓市仍有恐慌性入市味道,不止未見風吹草動,更未能成功降溫,只怕是溫水煮蛙。當大家眼見癲價蔓延至居屋與公屋,連車位都可稱王稱霸,等於當股票市場中武林正宗的大價股已開到荼微,自會輪到細價股肆虐。
單純以周期理論去推斷樓市的未來,根本係以偏概全,十多年前未有QE、購買力亦不一樣,以往放水可谷經濟,當全宇宙都在放水,瘋狂過後,自廢武功。今天樓市所處經濟基本面貌與十多年前自然不一樣,分析方法與模型亦須update,不加入多點最新市場參數、單憑舊思維進行預測,就算看淡預言終在長期唱淡下成功實現,你會buy這種似是而非的分析嗎?
轉載自: 晴報
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票