立法會補選嘅提名期噚日就開始咗啦，建制派繼新民黨嘅陳家珮報咗港島區之後，今日就到「九龍西特產」、民建聯（民記）鄭泳舜(Vincent)報名兼造勢大會。作為九西建制派指定候選人，舜仔一出就梗係有眾星拱照啦！除咗一眾建制派元老同議員之外，仲有前財經事務及庫務局局長陳家強撐場！直頭係一齣「星光燿爠耀泳舜」呀！大堆頭製作點可以少咗趣劇環節呢？所以蔣麗芸（Ann姐）同舜仔一於畀啲歡樂大家！

  

呢個畫面Jenny只可以用So sweet 來形容，係母子情嗰種sweet。

 

陳家強為鄭泳舜獻出「第一次」

 

　　首先，有Face有Money嘅舜仔先獲陳家強獻出佢個「第一次」！就係首次為立法會議員候選人站台。咁多建制明星撐場，Jenny就覺得要數Ann姐最落力啦！作為九西票后，Ann姐可謂落足120分力去關照呢位「九龍西特產」，當正仔仔咁教！今日個大會特登企喺舜仔隔離，係咁指點舜仔應該點做點做，本來就冇咩嘢，但唔記得心口有枝咪一直收緊音，結果咩幕後對話都畀人聽晒，不過Jenny又覺得幾有娛樂性吖！

 

　　喺呢到Jenny都要真係不得不讚吓民記嘅器材幾咁優良！想做立法會議員，形象幾時都好緊要。Ann姐就深明呢個道理，教精舜仔：「記住陣間上前呢，要走埋去攬吓爸爸。」仲強調：「呢個動作要做㗎！」鄭泳舜好乖咁點頭照做：「知道、知道！」、「好呀！」唔講仲以為民記唔記得請PR，要Ann姐兼任添！

 

Ann姐教舜仔 零刪剪直播

 

　　除咗啱啱嘅「關公訓練」直播之外，喺大會開始時，舜仔就覺得枝咪唔夠聲，問啲工作人員「支咪喺邊到，驚唔夠聲。」，仲想行去後面睇吓點搞，Ann姐就拉返佢返嚟，教仔咁款：「你唔好理，你笑住望鏡頭，笑住……」鄭泳舜都即刻好似應阿媽咁：「得啦，知喇！」

 

　　Jenny見到舜仔深呼吸咗一大啖氣，隨即E起棚牙，出盡力咁笑出嚟，Ann當然好滿意:「幾靚呀啲相！」。其他嘉賓致辭時，舜仔都只係笑住咁望，不過到Ann姐致辭時，舜仔就好似聽書咁，係咁話「知道、知道」。舜仔開頭仲識賣口乖話：「多謝Ann姐你過嚟！」Ann姐即秒回：「我梗係過嚟啦，痴線！」睇嚟呢對「九西母子檔」都幾啱Key呀！

 

　　今日舜仔就有前高官撐場、又有Ann姐現場指導，咁唔知聽日報名嘅黨友鄧家彪（阿Bill）又有冇前高官或Super PR幫幫手搞氣氛呢？Jenny好期待啊！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好