星期日（14日）就係民主派初選嘅日子，Jenny見到各位參選人呢排都有唔少嘢搞，蒲個頭、爭取吓選民支持咁噃！各施各法就係為咗喺最後直路拉票爭人氣。

 

 

上：新界東參選人（左起：范國威、郭永健、張秀賢）都叫有得爭下。

下：九龍西參選人（左起：袁海文、姚松炎、馮檢基）結果似乎已經好明顯。

 

咖哩飯玩軟銷 早就「畫公仔畫出腸」

 

　　不過Jenny都係嗰句，就算民主派今個星期做完初選，其實都已經遲過建制派嘅宣傳多多聲㗎啦！唔知參選人之一嘅新民主同盟范國威（咖哩飯）係唔係同Jenny 嘅諗法一樣，所以都等唔切初選舉行，就已經學建制派嘅鄧家彪（阿Bill）同鄭泳舜(Vincent)咁，喺各條小巴線，甚至地鐵沿線掛起佢個嘜頭Banner，呢排仲係日日喺街站畫年畫，睇嚟佢想入返議會嘅心聲，就真係「畫公仔畫出腸」喎！

 

細孖昅實鄭若驊

 

　　咖哩飯用軟性推銷，佢嘅對手、工黨郭永健（細孖）都唔執輸，不過係做咗啲正經嘢先！事關當Jenny同行家們噚日喺立會捕住鄭若驊司長嘅時候，細孖就率先走咗去警察總部，報案指鄭若驊喺僭建事件上涉嫌作出虛假陳述，而咖哩飯都係今日先同佢啲黨友去報案，慢咗半日。呢局睇嚟，細孖稍勝！

 

張秀賢初選前遇襲

 

　　而另一個新東參選人張秀賢就冇搞咩新意思，反而係被人搞噃！事關佢今個星期一（8日）下晝收到一封刀片信，信入面仲有佢去調查海麗邨清潔工工潮嘅報道。跟住佢當晚就喺大圍遇襲，不過佢就唔肯定遇襲係同嗰封刀片信，抑或係參加初選有關喇！

 

姚松炎獲「男神」加持

 

　　鏡頭一轉嚟到九西，Jenny知道作為九西大熱嘅姚松炎教授竟然搵咗《選戰》男神王宗堯拍片，呼籲大家星期日記得出嚟投票，如果唔係初選結果出咗嚟，點知自己個心水候選人冇份，咁就喊都冇謂喇……

 

基哥Chok爆自命「政壇李克勤」

 

　　姚教授識拍片，民協馮檢基（基哥）都一樣識㗎！不過「男神」就冇喇，「政壇李克勤」你又啱唔啱？利申！唔係Jenny講嘅，係基哥自稱㗎咋！事關日前有人就話李克勤係「樂壇馮檢基」，點知噚日基哥就出咗條片，Chok晒咁話自己係「政壇李克勤」，仲話自己同李克勤有好多共同點喎……結果啲「嬲嬲」一發不可收拾。

 

　　即係咁，基哥，你有冇問過李克勤先？再者，邏輯上其實大家都知道「阿媽係女人」，不過就唔係逢女人都係阿媽囉……

 

定係「方國珊The Second」？

 

　　唔知係唔係驚條片唔夠姚教授Fight，基哥仲喺條片度講明，今次係佢最後一次參選噃！不過呢句說話係咪似曾相識呢？冇錯，皆因呢句說話，係前年嘅方國珊都講過㗎！結果佢咪又係走出嚟選！計Jenny話「姣婆守唔到寡」呢回事，大家早就見怪不怪喇。或者基哥其實唔係「政壇李克勤」，係「方國珊The Second」？

 

Who is 袁海文？

 

　　正當兩位「片」來「片」去之際，另一九西參選人袁海文仲係致力於佢嘅美容「事業」，可以話「和理非」到一個點……Jenny見到佢Facebook除咗叫人去投票之外，對上一個Post都仲係講緊美容業。不過Jenny收到風，原來佢之前同有「美魔女」之稱嘅羅霖合照，諗住提升吓知名度，不過聽講羅霖就因為呢張相「受壓」，袁海文唯有Del咗張相，所以Facebook入面都冇乜特別有睇頭嘅Post嚕！Jenny就真係唔知淨返咁少時間，文仔究竟仲有冇招數可以谷吓人氣呢？如果冇就真係Game Over。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇