2018-01-16
劉頴匡第一個出嚟「鎅票」咖哩飯腹背受敵
噚日民主派嘅初選結果就出咗啦,贏咗新界東選區嘅係出名有地區經驗、但係喺政壇人緣唔多好嘅范國威(咖哩飯),佢將會同建制派知名度都唔差嘅鄧家彪(阿Bill)對撼。
其實佢哋兩位都係曾經入過議會,知名度可以話係不分上下,之不過阿Bill就有工聯會同民建聯雙重黨籍,公記民記一齊撐,相信都可以箍實建制選民嘅票;不過咖喱飯雖然打着「務實本土」嘅口號,但係本土派係唔係肯支持佢就仍然成疑。
劉頴匡知名度低,今日開記招場面冷清到一個點......
本土派劉頴匡原來曾是咖哩Fans
嗱!至少今日Jenny就見到第一個本土派人士話想參選啦!呢位本土派人士就係社區網絡聯盟嘅劉頴匡,講個秘密你知,其實佢以前係咖喱飯啲Fans嚟㗎!不過之前就因為退聯事件嗌大交,從此分道揚鏢。
今日佢就喺民主派初選嘅其中一個票站選址舉行記者會,表明自己都有意參選噃!踩場意味非常濃烈啦!當然牢騷亦係小不了啦!佢話,原本新界東呢個議席係屬於代表梁天琦出選嘅梁頌恆,即係本土派嘅!而咖哩飯同佢嘅政黨就係旺角衝突事件同本土派「割蓆」,所以對佢嘅人格好有保留,又話負責協調初選嘅民主動力召集人趙家賢上個月27號同佢傾完電話之後,一直都冇再回覆,所以佢就決定唔等喇,今日就召開記者會宣布自己想參選。
民主大黨講到明 唔撐咖哩飯?
咁其實想參選,當初參加民主動力個初選咪得囉?劉穎匡同Jenny講,其實得到梁頌恆支持嘅時候係12月尾,加上本土派本身都唔支持初選機制,覺得佢自己肯主動提出同民主派溝通已經係行多咗步添!既然梁頌恆支持你,咁點解梁生今日唔蒲一蒲頭呢?劉穎匡就同Jenny解釋,今日個記者會係主要想講民主動力唔肯溝通,所以唔覺得要「晒冷」叫一堆人出嚟喎!仲話已經拎到梁頌恆嘅書面支持添!睇嚟佢都勢在必行咁喎!
Jenny亦都聽講,同范國威有「牙齒印」嘅民主大黨就講明就算佢贏咗初選,都唔會幫佢站台。Jenny就估,咖喱飯就算有其他民主派嘅支持,如果某啲地區嘅「樁腳」唔幫手宣傳,結果個投票率低嘅話,咖喱飯其實都危危乎,而家連佢嘅前Fans劉穎匡都話出嚟選,無疑令到佢嘅選情更加嚴峻。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情