【被同事圍剿？】影完結婚相鬧爆攝影公司

　　近排唔知係咪好多「好日」，特別多人結婚，打開facebook唔同圈子都有人擺酒結婚，連電視都不停見到藝人結婚嘅消息。咁我公司有個同team女同事叫Cynthia，亦都好事近，早排仲特登請假去影pre-wedding添！我都好明白女人對於結婚視為終身大事，一生人只得一次，梗係想做到最靚最好睇。不過，Cynthia似乎對攝影公司諸多不滿，連我呢個同Team同事都忍唔住話佢一聲「港女」。 

 

　　某日lunch hour，大家問起Cynthia影pre-wedding影成點，佢就相當勞氣咁狂數攝影公司及婚紗租賃公司。 

 

　　「嘩！講起就嬲！佢地影得好差囉！」 

 

　　「吓？咩事呀？」 另一女同事問。

 

　　Cynthia拎電話出嚟掃：「比你地睇下！呢張要我企上啲石到，但根本唔夠helper囉！得嗰一個人幫手，顧得到條裙又顧唔到我個頭，如果唔係我老公扶住我，我跌咗落海啦！仲有呀！呢幾張啲頭飾全部我自己買架！佢哋一件都無畀我囉！」 

 

　　「吓？頭飾都無？咩公司嚟架！」女同事問。

 

　　「有就有，不過一件都無攞畀我囉！仲要影得勁樣衰！你睇下我老公！淨係叫佢雙手插下袋，捉下衫領咁，好無聊、好普通囉！」

 

　　「近期都興影啲搞鬼結婚相嘅，好似之前陳小春同應采兒咁，果啲都幾得意呀！但你有無表達過你意願畀人知先？」阿姐勇猛出聲。

 

 

　　「咁又無…」Cynthia一秒被KO！

 

　　嗱！今次我就Buy阿姐啦！Cynthia開口埋口係喺到怨人哋間公司，話人哋無準備頭飾畀你，咁你簽package時又有無睇清楚租借嘅究竟包啲乜先？白紙黑字寫清楚，無包就係無包。你想要嘅，話知佢要加錢，當時就應該開聲要求。如果當日簽張package係話明包頭飾，但到左影相當日無準備畀你，我就唔信你唔告到佢甩褲。

 

　　另外，你又嫌人地教你擺pose太過無聊太過普通。你想影到王君馨「花曼」咁打哂功夫唔係唔得，但我相信攝影公司收到個咁高難度嘅order，點都會收貴少少，做多啲準備嘅。都係果句，錢，你比咗，佢無提供服務的話，我唔信你唔出聲！除非你本身事前無要求，但事後又諸多埋怨啦！

 

 

　　呢件事亦都反映出，簡單一個Lunch Hour嘅小吹水原來超危險。你以為你分享日常少事？其實每講一件事，同事或者阿姐都係認定你係咩人。好似Cynthia咁，大家咪從此認定咗佢係「港女」，以及做事唔細心嘅人囉！計我話，同同事交心？真係要小心為上！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！► 立即行動