有經驗就知，拍拖同偷食一樣要收收埋埋

　　人人皆知，偷情當然要偷偷摸摸，不被人發現才叫做偷情。但原來出到社會工作，就算擁有穩定的伴侶、光明正大的戀情，你都必須要如偷情一樣，躲在黑暗之中進行。不然，回到公司遇到三姑六婆，先被攻擊第一輪；再尷尬遇上點頭之交同事，你才突然醒起：唉～早知唔好咁揚啦！ 

 

 

　　事件發生在一個女同事Kelly身上。全公司都知Kelly有個穩定男朋友，只是大家一直都未有機會見面。一日放工，Kelly約了男朋友在中環吃飯，難得Happy Friday，一兩杯酒落肚少不免。飲了酒、又holiday mood、又難得至愛在旁。Kelly一時興起，和男友打了個「車輪」，到她再次睜眼面對世人時，惡夢就開始了。原來她睜眼之時，和隔離team合作過、每次見面都只會點個頭的男同事對眼。Kelly即時移開視線，希望二人「扮無嘢」。 

 

 

　　到了Blue Monday，有緣的二人相逢於升降機。相信大家都體驗過，在升降機遇上點頭之交，是何等尷尬。那短短的兩分鐘，四周圍環境奇靜，你我又站得出奇地近，總覺得「唔出句聲好似唔係太好喎……」捽之，陌生男同事先打開話匣子……

 

　　「星期五食飯啊？」

 

　　「係呀！」（心諗：廢話！喺餐廳出現唔喺食飯唔通係度打牌啊？）

 

　　偏偏這個時候，陌生男同事懶鬼馬地問一句：

 

　　「同你一齊嗰個呢？男朋友啊？咁親密！」

 

　　「哈哈哈，係啊！」

 

　　Kelly心入面已經一百句粗口問候緊同事，為甚麼要重提？為甚麼要曲線告訴我你看到我在打「車輪」？為甚麼你又要曲線告訴同LIFT的陌生同事知，我和一個男人很親密？地獄兩分鐘終於過去，但原來折磨仍未完結！因為升降機內的一傳十，變成了出LIFT後的十傳百，所有三姑六婆即刻對Kelly顯示出無限關心，直頭就金牌媒人Meiling一樣幫你揀仔！

 

　　「哎啊，聽講你男朋友幾靚仔喎！不過係咪大你好多啫？」

 

　　「點解佢著T-Shirt短褲嘅？佢唔係返工架？」

 

　　「嘩！你睇緊啲佢啊！咁多時間唔使返工，好易出去識妹妹仔架！」

 

　　一百個不是建議的建議同時襲擊Kelly。慘就慘在，班三姑六婆連年紀都是「姑婆輩」，個個有番咁上下地位。你想鬧佢串佢？忍下好啦！想收工同honey食餐便飯？不然你就帶他出來示人，不然你就偷個情，免得惹來姑婆攻擊。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情