【同感】中環女人返工呢刻最無自信

　　中環女人返工打扮落幾多心機唔使多講！由髮型、衣著、手袋、化妝連指甲都要一絲不苟。目的：梗係要風風騷騷⋯⋯唔係！係風風光光咁踏入香港島，做個專業高級行政人員，成為萬千學生尊敬的中環專業人士、數以百計在職男仰慕的嫵媚女神！講就易，又有無人知道，表面自信滿滿的女神，內裏其實就自己儀容擔心緊十萬樣嘢，成日都突然神經失常，變成零自信嘅多疑天后！ 

失常1：我條裙有無摺起呢？ 

　　返工前著咗好殺死人嘅半截裙，露出白滑雙腿本身就（自覺）係女神！但永遠坐底再起身，行行下都會突然好淆底，究竟條裙有無摺起咗呢？如果摺起咗，頭先經過幾OK個男仔咪見到？用唔用手撥一撥條裙好呢？但如果條裙無摺起，行行下無端端撥條裙咪好樣衰？雖然我都明白香港行去中環條路，人人都好似競步咁，假若你嘅節奏稍稍停頓去撥條裙，跟在後面的選手都會好似骨牌咁跟住停頓。係就係諗多咗，其實簡單撥一撥條裙都唔會太影響後面跟住嘅人，同時又可解決突然零自信嘅問題。不過，你明嘅，女仔總會無啦啦擔心起各樣問題。 

失常2：望住我？唔通我塊面⋯⋯

　　每日除咗衣著，梗係要化返個為自己加99分嘅精緻妝容啦。朝早8點幾、9點，係人個妝都夠靚啦！但經歷咗返工、食Lunch、見客等等要戶外活動，再加上香港又熱又濕嘅天氣，邊有OL個妝唔溶，仲保持到完美妝容啊？暗瘡、細紋、雀斑等瑕疵一早走晒出嚟見人！打回原形都算，最慘係皮膚經過一日冷氣抽乾，某啲位開始甩皮、眼線又甩到變熊貓眼，呢個樣簡直係將你原本個樣再扣50分！當你喺地鐵車箱倒影望一望自己個殘樣，再鏡中發現原來企你隔離，大家相距只有十幾cm嘅男人望緊你⋯⋯突然，你想搵窿捐！你怕人地近距離見到你滿面油光、毛孔現形、彩妝又甩到一撻撻嘅樣，然後開始唔想同人有眼神接觸。

　　就係咁，一個原本打扮到成個女神，充滿自信、所以地方都（自覺）近乎完美的OL，會突然諗多咗（好多），覺得自己總係有地方不足，怕人地見到你不完美的一面。其實，老土講句，世界上邊有完美嘅人。預期閃閃縮縮在意呢樣嗰樣，不如大大方方，做個真正有自信嘅女神！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇