落選港姐拍片要求多！上司幫到盡唔通係商業秘密？

　　香港官僚制度唔算嚴重（我覺得），起碼唔使好似日本、韓國咁下下低頭鞠躬。不過有時有啲上司真係好鍾意擺官威，做小薯嘅我哋，自然同上司產生距離感、有種神聖不可侵犯嘅感覺。就算工作上明明覺得上司的「提議」多鬼餘、「決定」錯鬼晒，都一樣要支持佢、跟佢說話去做！谷埋谷埋其實好想爆佢一獲，偏偏階級差距所限。但假若有人同你出氣？當下真係身心舒暢百倍！

 

　　話說公司有個Project想搵啲後生嘅女明星去拍片，當大家都認為女星S夠晒青春活潑，Fit晒班Target Consumer時，上司卻執意要用另一個落選港姐。論外貌，人人口味不同，但起碼女星S係我哋Team票選中先贏一局；輪知名度，女星S領先一大截，大家諗極都唔明點解上司要用落選港姐。

 

 

　　落選港姐出身小康之家，拍攝要求十分多！出國拍攝要求坐Business、住指定酒店、帶私人髮型師、化妝師等等。最過份係，竟然要求帶埋阿媽去，話做助手喎，錢梗係公司出啦！好！同事辛辛苦苦湊完「巨星」，如果片拍得靚，當然一切都值回票價，但結果落選港姐講野又Lur，表情又生硬……不過，上司收貨不但止，仲大讚落選港姐添。之但係上司嘅個人喜好就過唔到大老闆嗰關……

 

　　「我想問點解會搵個落選港姐嚟拍？落選架喎！」

 

　　「因為我哋諗住佢Background係鬼妹仔，夠Energetic，又講到流利英文，可以令個Brand高級啲……」

 

　　「邊個識佢啊？我都唔知佢邊個囉！你身為呢個Project嘅Manager你有責任去揀個合適人選！仲要控制budget！點解個trip用咗咁多錢？畀錢佢去玩啊？」

 

 

　　「係……知道……」

 

　　大老闆一句又一句的高聲責罵，簡直幫我哋成條Team出返啖氣！大老闆鬧嘅所有問題，我哋都有同上司反映過，只係佢唔聽！上司應承落選港姐嘅所有離譜要求，仲令我曾經誤以為呢啲係高層的商業決定，選角只係扮民主，點知原來上司真係乜都就晒落選港姐！當時我哋班小薯望住平日「也文也武」、以為自己高高在上的上司畀大老闆猛捽，心情的確係矛盾！一方面緊係想大老闆大大力咁捽，以解心頭之恨；另一方面又怕上司被捽後將脾氣發泄係我哋身上。其實點都好，做又係做死我哋，氣又係我哋受，呢啲先真正係打工仔之悲哀！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票