2017-09-28
【小薯自保3點必學】千祈唔好同上司講真話
上星期講到打工小薯收到上頭指示,要係7日內(實情得6日)準備好份精心炮製,有15個卡通人樣嘅自畫像。進度嚟到畫家願意用1日時間重畫上司唔滿意嘅兩個人像。到咗再交畫當日,時間只剩下2日,而印刷鋪需要3個工作天去印畫,再加埋上司嘅再度不滿……同事受壓到臨界點!
「係好咗啲,但都係唔似囉!!」
「其實我覺得好似架啦!同埋我哋真係無時間,印刷嗰邊要3日時間先起到貨,我地而家得2日,我都要諗計氹佢2日內起貨。」
「唔似都算啦,但我地件衫都唔係公司Brand Color,要再改啊!」
「呃⋯⋯我問下佢再答你⋯⋯」
每次交畫都總係有嘢唔滿意,第1次交畫時又唔叫人改埋Brand Color,同事梗係嬲到出煙啦。但嬲到燒著都好,都要諗辦法解決件事。所以同事直頭唔再交畀畫家轉顏色,自己化身designer快手改色。結果,重改嘅自畫像3.0誕生!而上司都免為其難咁Approve咗幅畫,下達可以印畫!
不過,心水清嘅人都會問:人哋印畫要3日,你得2日時間,點氹呢?唔通錢真係萬能?其實印刷鋪的確要3日時間去印畫,但同時亦有高速2日印畫服務,只不過價錢就貴50%。而同事好醒目咁無同上司提過高速印刷,淨係提出印畫要3日,留返1日Buffer位畀自己!最終,叫做有驚無險咁趕得切喺7日內「死」到幅畫出嚟交差!
呢件事證明咗,如果小薯想保障自己,以下3點必須學識!
第一點,有機會嘅千祈唔好同上司講真話。好似今次事件入面,如果同事唔係隱瞞有2日高速印畫服務,留返1日Buffer位畀自己,一定唔可以喺7日內整到幅畫。因為上司係唔會理你所講嘅時間限制,硬係鍾意將件事拖到最後一刻先放手。
第二點,記得保留所有上司做決定嘅證據!有啲上司自己決定咗啲咩都唔知,就好似揀咗文中「木顏色風」嘅畫家咁,事後會突然反口話自己無落呢個決定。到時得你同上司面面相覷,認錯嗰個仲可以係邊個!所以一定要保留證據去保護自己!
最後,必要時唔好畀選擇權上司。假如時間唔夠,你仲畀幾廿樣嘅上司揀,只會養到佢愈嚟愈挑剔。迫佢做隻井底之蛙,唔畀佢見其他選擇,自然無得挑剔咁多,揀嘢及落決定時都會爽快10倍,為你慳返唔少時間!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
夏日中暑高風險!即睇中暑迷思+預防措施!► 立即了解