遇到毒舌上司，小薯仔點拆招？

　　同事性格可以分好多種，有啱傾、有唔啱傾。假若遇到唔啱傾嘅同事，合則來，不合則去，最多咪疏遠啲、少啲同佢交手。假若唔啱傾果個係你上司，為左份糧，迫自己奉承佢都要頂硬上；但假若上司講哂人生攻擊的說話，仲以為自己好好笑，你，作為一個well educated嘅成年人，會點樣面對？ 

 

 

　　一間公司嘅真正高層，其實你好少可以見到佢。因為佢每日嘅工作都係同其他公司嘅高層聯誼下，之後就合作，搞搞新project畀啲下人去做。既然咁少喺公司出沒，當然都唔太清楚公司有咩員工啦，但大時大節或者心情好時，點都要返公司露一露面嘅。只不過佢地每次露面，都會令到唔少同事難堪。 

 

　　難得返公司見下人，如非節日都一定係有重大事件。濟濟一堂最啱就係影相留倩影，順便話畀人知高層同大家一樣，凡事親力親為，仲同下屬打成一遍添。但排位果陣… 

 

 

　　「咁齊人，大家企過嚟一齊影張相！方包，你都要影啊，唔好匿埋！」 

 

　　揸機同事：「企埋啲啊，唔夠位啊！」 

 

　　「方包，你企入啲啦！你隻角突咗出去啦！」 

 

　　此時，大家都笑聲笑聲滿載溫馨。你以為真係咁溫馨？被高層叫做「方包」呢位同事，從不知自己有個咁嘅花名，不過全世界（包括佢自己）都知係話緊佢！點解？因為呢位同事塊面的確比常人方，而少返嚟嘅高層又唔知佢叫咩名，咪懶風趣咁叫人地做方包囉。 

 

　　而高層相當喜歡講完嘢之後，好似老師咁，問返大家佢講過乜。大家為咗唔好畀佢點相，當然會自動波避開同佢有眼神接觸啦。而今次另一位女同事，就因為喺happy Friday著上近期好hit嘅off shoulder上衣被點相。 

 

　　「企嗰度跌哂膊懶索果位女同事答吖，我啱啱講乜？」 

 

 

　　講乜緊係唔係重點啦！重點係，你喺咁多人面前，咁樣形容一個女同事，會唔會mean咗少少？擦開鞋嘅，可以話佢係「鬼仔性格，講下笑啫～」，但一個成年有教養嘅人都知，佢此舉絕對係冇禮貌多過幽默！偏偏呢啲人身攻擊他人為樂嘅人，又會成為大家嘅高層。而一班小薯可以做嘅，只有奉承佢地嘅無禮，務求幫老闆充撐一下場面。甚麼人性道德，禮儀修養，一早畀功名遮蓋咗喇。打工仔除咗要出賣肉身日日為老闆賣力，都要出賣自己的教養。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票