2017-10-26
主題樂園包場試玩，竟然發生「驚嚇」事件……
香港各大型主題樂園都紛紛舉辦咗Halloween應節順便吸金。而貴為中環一間跨國企業，經常對外宣稱業務有幾龐大、員工福利有幾優越等等，包場試玩是常識吧？所以，早在主題樂園公開畀公眾入場前，公司一早就預訂咗一日包場，畀公司員工、親友收工後，入場率先試玩！
話就話包場，但其實門票一樣係限量，你估公司真係財雄勢大到連你五表姐個姨丈都畀你帶入場咩？所以，每位員工最多只限拎兩張飛。至於嗰啲對主題樂園冇興趣嘅同事，有啲當然唔好「嘥」，送飛畀其他比較親嘅同事；有啲就直情唔拎飛，擺返係負責department 嗰度等有緣人。不過，「員工飛」一樣衍生咗唔少階級問題。講真，每位員工只限拎兩張飛，但你估全公司都未結婚咩？有一家大細嘅同事，得嗰兩張飛，帶得個仔又帶唔到老婆，身邊又冇同事肯送飛，唯有去相關部門排「棄飛」啦。係啊！排隊啊，有人唔要咪先到先得咁送出去囉。但最無奈嘅係，連高層都會嚟撲飛！當然，人哋條隊就短好多喇，假如佢前面無高高層，咁佢自然排第一啦。簡單嚟講，係打你小薯尖啊，鬼叫我高級啊？
到咗活動當日，單身寡人嘅我唯有帶個同性友一齊去，而同Team的一位已為爸爸的同事，就拋棄老婆，同仔仔二人世界。老實講，千幾二千人玩晒成個主題樂團，排嘅每一條隊都係用「分鐘」嚟做單位，你就知包場試玩有幾爽皮。不過，到咗食飯時間，悲劇先發生。
有細路跟身嘅大人都知，小朋友唔捱得肚餓。但奈何樂園裏面啲野食真係貴到「媽媽聲」，冇乜事真係寧願早啲走出去金鐘食。男同事見阿仔肚餓，咪買個最抵買，值成$60嘅熱狗餐畀佢醫肚。偏偏上司一家人又同時去搵食……
「咦，Edmond！叫叔叔同姨姨啊！」(同事指導仔仔向上司請安)
「Hello啊！你幾歲啊？」
「我6歲」(手指擺住6的手勢)
「就升小學喇喎？你想讀邊間小學先？」
小朋友唔識答，然後攬住同事。
「哈哈，大方啲！要好似哥哥咁，學多啲英文、見多啲野，大膽啲先考到好學校架！」
「哈哈，知道架啦！」同事即為小朋友解圍。
之後，麻煩的上司一家告別後，就去咗買嘢食。點知，呢個時候，同事仔仔竟然問咗句：「爸爸，點解佢媽咪可以嚟，我哋媽咪唔嚟嘅？」
同事望望我，之後下回繼續……
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
第九屆「傳媒轉型大獎」請投etnet經濟通一票！ ► 立即行動
