八婆有咩唔想知？竟然係同事嘅偷情史？(上)

　　女人有幾八卦，講是非能力有幾強勁係人都知！離十尺遠聞到有是非，實九秒九衝去八卦一下。講到拍拖、偷情等等感情問題，必定係姐妹心目中至愛八婆話題！不過，有冇諗過，有一日你唔再因為偷情呢啲八卦事感到興奮，反而因為知道呢件八卦事，而身心承受巨大壓力，令你日日情緒低落呢？ 

 

 

　　事緣Amy同Jennifer係公司friend如孖妹，就如讀書時代一齊打拼過、一齊走過堂的一生摯友。幸福嘅Amy有朋友、有事業，亦都有個好錫佢嘅男朋友－Tom，Jennifer同Tom亦因為Amy成為好朋友。本來三人行，令苦悶變態嘅扮工變得有知音人，齊齊講是非。

 

　　不過有一日，Jennifer收工同朋友食完飯，去咗尖沙咀海旁散步，竟然撞到Amy，仲要拖住都係同Team、Tom嘅老友Edward！三人見到面，唔好講話避忌、尷尬，Amy竟然突然係Jennifer面前爆笑出黎！面對笑騎騎嘅Amy，Jennifer一時都唔識反應，只好以笑去回應。之後Amy沒有打算解釋的態度，笑騎騎地「橋」住Edward隻手，請一聲：「ByeBye！」就走了。 

 

　　Jennifer冇再過問Amy有關佢同Edward嘅關係，以及對Tom的不忠。因為Jennifer只係本住：Amy作為朋友，一直對佢好好，朋友嚟講真係冇得彈，就算Amy感情關係比較複雜，都影響唔到佢哋之間嘅友誼。

 

　　之不過，問題嚟啦！Amy係你好姐妹，Tom又係你好朋友，真正手掌係肉，手背又係肉。要出賣，正常人都會出賣冇咁friend果邊啦，但又唔想背負「幫兇」呢個罪名？結果Jennifer選擇扮乜都唔知，乜都睇唔到。雖然咁做道德上已經係錯，但作為夾心階層，只有咁做先可以維持三人的友誼。

 

　　你知架啦，世界上幾多例子因為愛情路上見義勇為，最終男女主角雙方冇反目，反而係插手者成為兩邊的攻擊目標，所以感情嘅嘢局外人都係唔好插手。不過，Amy似乎唔係咁諗！自從偷情事件之後，Amy同Edward嘅秘密係Jennifer面前就愈來愈公開！ 

 

　　「Tom～我今日收工同Jennifer去行街呀！可能晏啲先番屋企。」Amy「橋」住Jennifer隻手講。

 

　　「哦！我今日有排OT呀，你番到屋企打比我吖！」 

 

　　當然，Jennifer都唔蠢，聽到「岩岩先知道嘅約會」都知道自己畀人利用，但當時拆穿佢又怕Amy嬲，加把咀和應又好似對Tom唔住，所以Jennifer焗住一句聲都唔出。到咗收工時間，Amy係Tom面前同Jennifer一齊走，點知去到Lobby，即巧遇Edward。

 

　　大家假寒暄幾句之後，又咁岩「順路」，一齊走向地鐵站、甚至「順路」一齊搭同一條線！Jennifer實在忍唔住，正想開口之際⋯⋯ 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好