2017-05-12
大隻小鮮肉犯眾憎 原因衰健身?
公司最近請咗個中層員工,對下有幾個幫手,對上亦要服侍一眾大佬、阿姐級人物,最重要嘅係新同事年輕、外貌娟好,而且做開gym,係一名著住恤衫都睇得見胸肌嘅大隻仔。一眾由20歲到40歲嘅女同事,當然都對佢「嗒晒糖」,瘋狂喺「獨女group」細味品評大隻仔一番,就連清潔pantry個姐姐都話:「哎呀!我啱啱喺茶水間撞到你地個新同事呀,大隻到茶水間都好似細咗咁!」不過,好景不常,只需一、兩個星期,大隻仔就由萬人景仰嘅男神位置,跌至畀萬人唾棄嘅犯眾憎。
原因好簡單,大隻仔健身太上癮!例如一次大家開會,會議室唔夠櫈,辦公室最低層──做細果班梗係自動波出去搵櫈。大隻仔就喺充滿高層嘅呢個時候講咗句:「唔使搵啦,我唔使坐,開住會深蹲難我唔到嘅!」本來當自嘲一下,比啲位下屬坐,能夠輕易製造關懷下屬的同理心,為自己搶唔少分數。但大隻仔衰在喺一眾嚴肅、正經高層面前講呢番說話,場面突兀之餘,仲畀人一種自大感,你話如何可以唔由好感度變為討厭度呢?
不過,令其討厭度提升都係歸咎於佢平日嘅行為。事發同樣係喺開會期間,你知有時開會真係有開始、冇完結,成日開開下會講其他嘢,最專業嘅演員都會有分心嘅時候,大部份打工仔都係扮Check e-mail實質覆下Whatsapp、碌下facebook。偏偏大隻仔又健身上腦,喺會議室做出夾胸舉二頭肌嘅動作,仲要唔知係咪反射動作,一路發出微微嘅「嘶~哈~」呼吸聲。老實講,喺現場嘅我要幫佢平反一句,呼吸聲真係唔算大,唔望住佢都唔會留意到佢發出呢啲聲。之但係佢夾胸舉二頭肌嘅舉動,又的確好忍人注目嘅……
仲有一次,成條Team話出去飲茶食lunch,唯獨是大隻仔拒絕。原因係佢帶咗私家飯盒,大家估都估到係蛋呀、雞胸呀等等充滿蛋白質食物。呢個行為本人一啲都唔反感,因為好多OL都會為咗減肥,自備得滾水味嘅恰菜,而拒絕出席Team lunch。但問題來了,大家飲完茶番嚟見到Pantry姐姐嬲爆爆咁口嗡嗡,一問之下,原本呀大隻仔先生為叮熱少少啲雞肉,成兜野連蛋擺入微波爐,之後恰蛋緊係爆煙花咁爆到四圍都係啦,仲要唔清潔番!最終咪演變成連唯一一個鍾意佢嘅姐姐都睇佢唔順眼囉!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇