公司有一種生物 叫人型臭屁蟲

　　春夏潮濕天氣再度來臨香港，各大傳媒開始提示大家小心昆蟲始肆虐。唔少網民已經中招，紛紛上載臭屁蟲蛋及臭屁蟲匿藏於衣物之中的相片。話就話臭屁蟲非害蟲種類，對人無害，但臭屁蟲本身臭過臭豆腐，臭屁蟲蛋的汁液又有機會導致皮膚敏感。真係唔理又煩住哂；理又一拍兩散。係呀，係辦公室一樣有呢啲臭屁人，你又會點樣處理佢？ 

 

 

　　公司的臭屁人叫Sindy，是個管理跨部門的Admin Assistant。點解叫做臭屁人？顧名思義，乜都鍾意跟人。例如一次，大家諗住淘寶，（無錯！中環人唔係下下都買名牌，都會淘寶的），同事A睇中件衫，擔心件衫質地參差，向同事B查問意見，點知同事B畀同事A燒埋一份： 

 

　　「你買啦！買完返嚟質地好我先再買。」 

 

　　「買咩呀？我又要一件！」Sindy聽到即刻答咀 

 

 

　　咁快落單？你知道人地睇緊乜咩？當你偷聽到同事A、B嘅對話，知道傾緊淘寶買衫，但衣物呢啲咁個人取向嘅野，佢竟然望都唔使望就話買多一件畀佢？仲有一次，大家Lunch time睇新．免費電視台嘅節目，有同事一眼就睇到朋友係節目中成為素人出鏡，Sindy竟然都話有？

 

　　「咦？呢個我舊同學嚟㗎喎！呀……但醒唔起叫咩名..」

 

　　「真係㗎？呢個都好似係我Friend個Friend呀」（指住節目中另一素人）

 

　　「等我搵吓Facebook先！真係改唔起咩名……呀！搵到啦！真係著住呢套衫喎」

 

　　電視中巧遇認識嘅人，興奮都好正常，但Sindy咁都要跟人？人地搵到Facebook證明真係相識關係，你呢？Friend個Friend？咁全世界都係朋友啦。同臭屁蟲一樣，本來臭屁人跟風就無傷大雅，但乜都跟、乜都要一樣，甚至將冇可能嘅事，為左跟人而扮有可能，呢種行為硬係令人覺得唔係好舒服同埋有點ODD。當時人唔篤爆你，只係怕到時變咗又Mean又小心眼嘅人，原理同臭屁蟲蛋一樣，篤爆仲麻煩呀！呢啲人，辦公室政治啲講你可以話佢係世界女，因為唔少老闆都鍾意員工投其所好，圍住自己轉。但對住我哋一班低下打工仔，都要一味靠跟，盞令人覺得你冇主見及影響印象。如果職場上遇到臭屁人？應該聽專家意見，用硬卡紙將佢掃走，千祈唔好篤爆佢哋，以免危害自己。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票