2020-05-26Text: 李皆穎

《Online有話兒》賭王金句重溫：你無法子夠賭場賭㗎！

　　「賭王」何鴻燊於今日（26日）病逝，享年98歲。「賭王」一生傳奇，喺面對傳媒嘅時候，經常都有妙語連珠金句，令人津津樂道，今日我哋就重溫一下「燊哥智慧」，分分鐘袋錢入你袋！

（CNS圖片）

1.對賭博：你無法子夠賭場賭㗎，因為我哋抽水㗎嘛！

　　「小賭怡情，大賭亂性」，長賭就一定唔會夠個莊玩。大部分賭局入面，莊家勝出機率永遠都會贏客仔小小，加上客仔贏莊家都要抽水，開賭可謂長做長有。所以「賭王」奉勸世人，賭博係玩耍娛樂，千萬唔好過分沉迷，所謂「長賭必輸」就係咁解，但燊哥都語氣深長咁講：「可惜啲人都唔會聽嘅。」

（CNS圖片）

2.對人生：上帝係好公平嘅，只要你勤力發憤，總有機會到你，到時就要識得把握

　　賭王出身於何東家族，喺香港皇仁書院讀過書，經歷過戰爭，亦被有錢親戚奚落過，所以燊哥先出盡力搵錢，而佢都經常勉勵年輕人要發憤圖強：「因為上帝好公平，當機會嚟到就要識得把握！」

（CNS圖片）

3.對老婆：笑容要似哈巴狗，但千祈唔好淪為「烚熟狗頭」

　　眾所周知，賭王有四房人；「賭王」曾經表示，四房人都樂也融融，不過喺2011年就曾經發生過爭產事件。但點都好，「燊哥」確實係一位「愛妻號」，而且講到明「四個都咁錫」，一到新年佢就會走晒四房，個個都陪食飯，連佢自己都話：「走到氣咳！」

　　點解賭王可以有四個老婆咁架勢堂？其實因為當年香港雖然係殖民地，但部分法例仍跟「大清律例」，所以賭王喺1942年娶完元配黎婉華，再喺1957年娶藍瓊纓為妾。直到70年代婚姻制度改革，改為一夫一妻制度，三房陳婉珍同四房梁安琪就以「三太」及「四太」為稱呼，雖然無正式註冊，但確係賭王公開承認嘅伴侶。

（CNS圖片）

4.對股市：恒指會繼續好落去，有機會見4字添！

　　時間要推返去2007年，當年股市日日創新高，恒指重破埋三萬點，傳媒問賭王有咩睇法，佢表示恒指將會繼續好落去：「有機會見4字（四萬點）添！港澳兩地前途無限，內地會力撐，兩地經濟想壞都難。」記者再追問幾時會到四萬點，佢風趣地答：「到四萬點先答你！」不過之後爆出雷曼事件，大家都知道往後係點。

（資料圖片）

5.對西九：中標財團肥到著唔到襪，好世界到不得了！

　　當年西九招標前後，賭王極力反對單一招標，因為到最後只有幾個有能力嘅財團先可以入到標，更形容中標財團：「肥到著唔到襪，好世界到不得了，而家更封埋你封大利是。」另外，如果單一招標，政府地價收益最多只有500至600億，但分拆的話就可以令庫房有2100億元收入，佢當年仲譏諷政府：「阿蘭賣豬！一千唔賣，賣八百！」