2020-06-15
《Online有話兒》英中貿易協會向政府游說:不應放棄14億人口的市場
中美打緊貿易戰之際,經常「頭髮亂了」嘅英國首相約翰遜就成日助攻,除咗話審視下用唔用華為做5G,最近又話考慮接收300萬符合BNO資格香港人,搞到連中、英關係都緊張埋。
英國自己都頭痕,歐盟問題未完又要同中國「開拖」,兩頭蠟燭一齊燒(Shutterstock圖片)
不過話返兩頭,中英兩國除咗政治爭拗之外,本身有好多貿易來往。上星期五(12日),英國宣布正式向歐盟表示唔會尋求延長脫歐過渡期,意味明年1月將與歐盟實質分道揚鑣。但雙方自貿協議八字未有一撇,加之是全球排名第五的肺疫重災區,剛揭盅的4月GDP就錄逾20%的史上最大單月跌幅;英國疫情加脫歐,已經頭到痕,而家若同中國「開拖」的話,真係兩頭蠟燭燒著,商家佬點會肯過你呢?
據《泰晤士報》報道,英中貿易協會(China-Britain Business Council(CBBC))正聯同一啲當地上市公司,要向英國政府表態,包括要求政府維護中英兩國關係。據該份文件指出,呢班商家佬除咗向英國政府陳述中英關係之利害,仲講咗樣好重要嘅嘢:「英國脫歐之後第一個戰略,就係唔應該放棄一個擁有14億人口嘅國家同市場。」
CBBC有咩來頭?主席古沛勤Sherard Cowper-Coles,係滙豐控股(00005)公共事務部主管,之前幾十年來都係幫英國做外交官。除咗匯豐,協會仲包括有渣打(02888)、英航、畢馬威會計師行(KPMG)、英國石油及葛蘭素史克等;仲有,就係華為都榜上有名!
呢份名單係CBBC五月刊入面,原來華為都係會員。(網上圖片)
講開華為,最近英國政府內部傳出,英方已決定逐步、並在2023年前徹底在5G電訊網絡建設中甩脫華為。最新消息指,英國已與日本NEC討論5G供應鏈多元化的問題,韓國三星也在其5G考慮之列。曾擔任戴卓爾夫人外交事務助理的Nile Gardiner形容計劃為「日落」,即華為在英國的角色將彷彿太陽落山一樣逐漸消失。
(Shutterstock圖片)
不過,有報告就指,限制華為可能會使英國全面5G計劃推遲兩年;就算係當地最大嘅工會組職「英國工商業聯合會」都講兩句,表示限制華為係當地建設5G,只會破壞英國經濟。
究竟英國幾時有5G用?我都唔知啊!
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情