隨住11月嘅美國總統選舉逼近，政治爭拗亦由競選造勢活動蔓延至辦公室。美國求職網站CareerBuilder早前委託調查公司，訪問任職私人機構共3,244 名打工仔及 1,902名管理層，探討相關爭拗情況，以及避免同事關係因爭拗而惡化嘅方法。嚟緊9月就係香港立法會選舉，呢份調查報告或者都有返咁上下嘅參考價值。

 

管理層/ 男性/ 年輕人最常談論候選人

 

　　調查顯示，管理層比打工仔更主動喺辦公室發起政治相關話題，情況喺下列行業最為普遍：

 

　　- IT（47%）

　　- 製造（37%）

　　- 專業及商業服務（30%）

　　- 金融服務（29%）

　　- 醫療保健（24%）

　　- 零售（23%）

 

　　調查結果亦發現，男性僱員（20%）比女性僱員（15%）更傾向與其他同事討論政見；而18至24歲嘅年輕員工比其他年齡層嘅打工仔，更容易於職場陷入激烈嘅政治爭論。

 

「政治正確」對職場有利？

 

　　公司通常要求打工仔保持「政治正確」（即言論、行為不冒犯社會中任何特定群體之利益），但原來大部分人都覺得自己被過分審查。50%受訪僱員同59%受訪僱主認為，美國嘅工作場所「過分地」政治正確，33%僱員更加因為驚畀人話政治不正確，而避免就某啲議題發表意見。

 

　　雖然22%打工仔相信政治正確對生意有利，但同時34%人認為咁樣會阻礙公司業務發展，因為當面對爭議性問題，員工會選擇迴避而唔係積極尋求解決辦法。

 

3招維護職場和平

 

　　要避免職場政治爭拗白熱化，影響同事間融洽關係，CareerBuilder人力資源顧問建議僱主採取以下措施：

 

　　1/ 言論自由與潛在衝突之間往往只係一線之差，僱主應提供以「尊重他人、注重個人行為操守」為主題嘅員工培訓，強調和而不同。

 

　　2/ 確保員工清楚知道公司處理辦公室騷擾嘅政策同投訴機制，並且嚴禁員工攜帶宣傳材料進入辦公室範圍。

 

　　3/ 建立暢所欲言及互相尊重嘅職場文化，但如果討論變得激烈，鼓勵員工離開「戰場」，暫時結束對話。

 

Source: ctgoodjobs.hk

• 

樂本健【雙11感謝祭】雙重優惠、多買多賞► 了解詳情