畀人讚梗係暗爽啦，但有時真係唔知點答，直接認咗佢好似太囂張，扯開話題又太突兀，最後搞到場面尷尷尬尬。打工仔，係時候向老尷說不！注意以下5大禁忌，包你回應得大方得體。

 

1/ 扯開話題

　　小生都明，好多人扯開話題係因為驚講落去顯得自己太自大，不斷邀功搏like咁，於是當同事或上司讚佢，佢會答：「唏！講呢啲！」，或者「阿邊個邊個其實仲犀利啦！」，實行耍走對方兼扮謙虛，但咁樣會令對方唔知畀咩反應你，最後老尷收場。其實只要簡單講句Thank you就OK啦。

 

2/ 無講多謝

　　人地讚你（如果唔係寸你），即係肯定你嘅努力同成果，你應該報以一句由衷嘅「多謝」，以顯示你嘅禮貌同專業。而且，一句「多謝」絕對會比你嘗試扯開話題更快結束話題。

 

3/ 以退為進搏更多like

　　有時你以為自己表現謙遜，其實潛意識係想搏更多like。即係點？即係人地讚你「你頭先present得好好呀」，然後你答「邊係丫，我講嘢講到一舊舊」。你以為係自嘲、自謙之詞（可能你原本意圖真係咁），但你會令到對方覺得有必要改變你消極嘅態度，增強你嘅信心，最後讚多你幾句，搞到個話題沒完沒了。

 

4/ 無留意身體語言

　　身體語言往往比口語傳遞更多信息，而接受讚賞時要表現得自信同專業，你嘅身體語言尤其重要。對讚賞表示感激只係第一步，你仲要面帶微笑，同讚你嘅人保持目光接觸，肢體呈開放式姿態，先會顯出你嘅真誠。切記避免翹起雙手或移開視線。

 

5/ 無禮尚往來

　　人地讚你，如果你老奉聽完就算，都真係幾寸幾唔識做。學識欣賞其他人嘅付出、犧牲同成果，唔好吝嗇你嘅讚美，日積月累，同事自然對你留低好印象，認為你係一個正面積極、富合作精神，願意同大家共同進退嘅隊友。

 

Source: ctgoodjobs.hk

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇