膠，學名聚苯乙烯，有軟硬之分。這本為一種化學物，為何會應用於人身上？撇除粗口諧音以外，「煩膠」如果要從其性質去解釋，應該就係指一個人的纏繞程度，好似一舊膠咁難以分解。究竟點樣可避免成為一舊膠，仲要係好煩嘅膠？

 

1/ 說話注意聲線

　　聲線係對話嘅重點，高8度講嘢彷如置身街市，低8度講嘢又好易令人瞓著。除調較好音量外，同時要留意聲調、字詞發音等，以免講多錯多。

 

2/ 重點只講一次

　　有時侯要將一啲重要事情講幾次作為提點無錯，但唔一定要去到無限loop嘅地步。如果有心聽，講一次就夠。最多，送一次reminder畀佢咁大把。唔一定要日講夜講，你唔煩部電話都爛。

 

3/ 不作無謂尖叫

　　唔是地震，唔是被失蹤，無須事事都要尖叫。「嘩！你好犀利呀！」「話我知啦！話我知啦！」（淨係呢幾句都已經有聲）。為確保聆聽者隻耳仔健康，建議減少尖叫為妙。

 

4/ 表情適可而止

　　與人談話時要心平氣和，保持冷靜。小小事就瞪大眼、O晒嘴，頭一兩次對方會覺得你份人直接。日子一耐，就容易畀人感覺太over、造作同煩厭。

 

5/ 管好個Fb

　　Facebook其中一個重要功能係尋找失落嘅朋友，但如果遇上喜愛發表偉論、凡事唔share唔舒服嘅fd子，下場就係日日被洗版，又或者不斷收到遊戲邀請。不過好彩，世上有一個功能，叫封鎖。

 

6/ 收埋部電話

　　個個都對住部電話「日篤夜篤」，連帶同朋友食餐飯都要「相機食先」，將相關食物以及朋友當作佈景板先影十幾廿萬張相，咁究竟幾時先有得食？

 

　　煩膠，不限性別、階級、年齡。

 

　　For打工仔︰謹記，辦公室內大概只有老細有煩膠權利。 

 

　　For男女朋友︰經常提及一段關係要有安全感，但安全感同煩膠，只係一線之差。

 

　　For眾親朋戚友︰要關心身邊人有好多方法，犯不著要展開攻防戰，下下派膠。

 

Source: ctgoodjobs.hk

• 

樂本健【年度感謝祭】維柏健及natural Factors全線2件7折► 了解詳情