【作嘔作悶】懷孕最「苦」莫過於孕吐！飲食貼士改善孕吐不適

　　「孕吐」、「噁心」幾乎係懷孕初期嘅代名詞，更令唔少準媽媽聞風喪膽，因而令新手媽媽出現疑問：嘔吐係咪懷孕必然嘅事？幾時會開始？會維持幾耐？

 

　　其實孕吐確實成因未明，但醫學界普遍認為主因係由於女性荷爾蒙變化，體內分泌嘅「人類絨毛膜激素」(HCG)增加有關。通常HCG濃度會隨懷孕日子增加，通常第6至12周係高峰期，約7至8成女性會伴隨出現嘔吐、噁心、頭暈、無力、食欲不振等一系列症狀，但之後會逐漸減少。

 

　　雖然孕吐成日都聽到，但唔一定每個孕婦都會出現以上情況，視乎體質同精神狀況而各有差異。有啲孕婦喺整個孕期，甚至懷孕幾次都冇出現不適。但有部分孕婦係有嚴重反應的，甚至可以一日嘔6次，人人反應都唔同！

 

　　見到某啲食物想嘔、食食下飯會突然唔想食、食乜嘔乜、頂住喉嚨呢啲「噁心」情況的確令人好煩厭，同時影響緊情緒，加重心理同生理壓力。但有統計顯示，有孕吐症狀嘅孕婦出現早產、自然流產、BB出世體重輕、BB周產期死亡等統稱「妊娠併發症」嘅風險較低。

 

紓緩孕吐不適

 

　　首先，可以由改變飲食習慣入手，以「少食多餐」方式減輕腸胃嘅負擔，同時避免空腹容易出現嘅胃酸逆流，引起反胃嘔吐。

 

　　其次，喺食物選擇方面，可以多選擇五穀類、低脂、無刺激性、容易消化嘅食物，例如饅頭、白麵包、餅乾、豆腐、瘦肉、蔬果等；而酒、咖啡、太熱或太冷、濃味或較刺激嘅食物應該避免。至於水分容易造成胃脹，引起反胃嘔吐，所以食粥飲湯水時亦應多加注意。

 

　　好多女性懷孕後都會突然鍾意食酸嘢，呢個亦係一個紓緩孕吐嘅方法，透過改變口腔氣味，減輕不適感，但要注意份量適宜，避免過量。

 

　　如果嘔吐情況嚴重，甚至影響日常飲食、嚴重脫水、體重下降，有機會係「妊娠劇吐症」，就要即刻向醫生求診！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好