開咗學已經一星期，好多小學上個星期都仲係適應周，通常都會返半日，琴日開始就真係正式返學喇。返全日制嘅小朋友就要開始漫長嘅返學時間，特別係初入小學嘅新生，六歲人仔起身計埋搭車，全日連踩8個鐘，好多家長睇見都辛苦……

 

　　睇返forum入面家長分享，「小學生的一天」通常都由晨早6:00開始，7:00前上校巴，返足一日之後多數3-4:00放學，返黎就係時候直踩補習或者做功課。運動同玩樂時間？當然無啦！好彩就早早做完功課可以有得9:00瞓。你話係唔係辛苦過做大人喇？

 

 

家長憂小朋友長期大壓力影響心智發展

 

　　全日制原意係下午可以進行其他活動，但留校時間太長，有家長都好擔心長此下去，影響到小朋友心智發展：「先唔計一堆功課要做，早上六點幾起床，直落到夜晚八九點先可以訓，多功課做或者要十點打後先可以瞓，大人都頂唔順，更何況細路，壓力咁大，難怪近年愈來愈多小朋友心靈扭曲甚至輕生。」

 

全日制學生難有親子時間

 

　　全日制令小朋友大部分時間都在學校，跟家人見面時間就更少，有家長提到小朋友可以連續幾日都見唔到爸爸：「我仔返小學時，除咗星期五、六晚可以見到爸爸外，可以連續幾日都見唔到爸爸一面，因為我C6放工返到屋企，仔就瞓咗，佢哋返學C6又未起身。」同一間屋都未必見到面，諗起都覺得心酸。

 

家長們：細個讀下晝班有得睇完電視先做功課

 

　　全日制自2000年起推行，之前嘅小朋友都係可以返上午或下午校，家長們比較現時小朋友嘅生活同自己當年細個，都替班全日制小朋友感到辛苦，好多家長都話當年可以睇電視完瞓午覺先做功課，輕鬆好多！不過亦有少數當年返全日制小學嘅家長，覺得以前返全日但無功課壓力：「我自細就係全日制，返學係超開心，因為有成班同齡同學，比係屋企對住大人有趣多了。無錯，老師會督住做呢樣果樣，但有同學一齊擔當，同同伴交往嘅樂趣，唔同大人遷就／陪伴一樣，更是成長一部分。」睇黎無論上下午班定全日制都各有支持者，最重要都係家長同學生心理係唔係都可以調節到，一齊搵到令自己同小朋友最舒服嘅方法迎接新學年！

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇