【新劇BB來了】道出新手媽媽辛酸　網民：睇到眼濕濕！

　　由李佳芯與黎諾懿主演的TVB新劇《BB來了》首播以來好評如潮，唔少媽媽都大讚拍得好寫實，對白亦好有共鳴，勾起咗好多佗B生仔嗰陣嘅回憶，愈睇愈投入，甚至睇到喊！一齊嚟細數9大媽媽共鳴位啦！

1. 懷孕初期心煩意亂

　　《BB來了》第一集講到女主角本身未有計劃生B，但得知意外懷孕後心情非常複雜，老公反應麻麻之餘，又要擔心事業受阻、身材走樣、皮膚變差等，最最最驚係「我要做人阿媽喇」嗰種巨大責任感，真係驚到喊出嚟！

2. 血脈雙連的感動

　　隨住佗B時間增加，有一日女主角第一次感受到BB隻腳仔踢佢肚皮，係血脈雙連呀！原來媽媽嘅喜怒哀怒，BB全部都感受到！

3. 婆媳糾紛萬年難題

　　女主角極力反對搬到奶奶附近住，因為真係好驚奶奶成日走嚟說三道四干擾自己湊仔！而且女主角啱啱生完BB仲喺醫院休養緊嘅時候，突然畀奶奶喪鬧唔識做人阿媽，好多媽媽觀眾表示睇到好氣憤！明明奶奶當年都生過BB，點解唔識體諒女人啱啱生完係最脆弱！

4. 娘家是重要的避風港

　　女主角媽媽深知親家奶奶脾性火爆，於是喺屋企擺定陣方便阿女隨時返娘家，仲霸氣講出一句：「女人有外家返先會矜貴！」真係好窩心好感動！幾時都話世上只有媽媽好！

5. 生仔搵命博

　　女主角因胎盤剝離被迫開刀生，睇住佢被推入手術室，被迫同老公分開，要自己一個面對冷冰冰嘅手術台，令觀眾忍唔住同佢一齊緊張BB嘅安危，加埋男主角喺手術室外個擔心樣，好多媽媽都話睇到喊！

6. 生完B變得好易喊

　　女主角生完BB後成日郁啲就喊，同之前嘅女強人形象判若兩人。醫生形容啱啱生完B嘅女人好似受咗傷嘅動物一樣咁脆弱，所以坐月期間情緒會有好大波動，仲好容易患上抑鬱。網上好多媽媽都身同感受，話生完嗰段時間係女人一生嘅最大難關！

7. 母乳真心滴滴皆辛苦

　　好多媽媽都笑言同《BB來了》女主角一樣，覺得生完BB好似變咗母牛咁，日日顧住餵奶。劇中女主角辛辛苦苦催乳儲返嚟嘅母乳，一個唔小心就倒瀉晒，真係好心痛！

8. 變得唔再愛老公？

　　劇中有一幕男主角差啲畀車撞到，但女主角一句慰問都冇，淨係關心手上抱住嘅BB。女主角爸爸於是同男主角分享經驗之談：「女人生完仔目空一切，有母性冇人性，會變得完全唔再愛你。」呢幕好多媽媽都睇到哈哈大笑，紛紛笑住話好有同感！

9. 必入「王國」媽媽谷！

　　劇中提到女主角獲介紹加入媽媽谷（即Whatsapp、Facebook的媽媽群組）及日日瀏覽「港媽王國」，由買BB嘢、湊BB、搵學校、搵興趣班，都可以互相交換行情，更有對白說：「冇上過港媽王國，點可以叫自己做港媽。」

　　這一幕令不少媽媽觀眾聯想到現實中的網絡平台「親子王國Baby Kingdom」，更有親子王國用戶留言：「擺明係我哋啦！」、「有啲劇情似曾相識，好似喺BK睇過。」

圖片來源：TVB《BB來了》截圖

《說說心理話》消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇