04/01/2021
《經濟不停學》小學雞學堂3:陰陽燭組合型態
上集《小學雞學堂》講完陰陽燭嘅單獨形態,唔知大家有冇好好溫書呢?今次就嚟講下陰陽燭嘅組合形態,意思就係用兩枝或以上嘅燭嚟做後市預測,可信性會高過用單一支燭睇,但相對嚟講組成嘅條件會難好多。
(Shutterstock圖片)
三個白武士/三飛烏鴉
「白武士」聽見就知道係好嘢,因為佢可以打救萬千股民,而組合「三個白武士」就由三枝大陽燭組成,而每一枝燭嘅燭身要長過前一枝,開市價亦要一枝比一枝高,好似三級向上嘅樓梯咁,因為代表個價/指數喺每一個時間段都由頭升到落尾,有穩步上揚嘅意味。如果出現喺低位,有機會止跌回穩。
相反,出現烏鴉梗係唔吉利啦,「三飛烏鴉」就由三枝大陰燭組成,而每一枝燭嘅開市價要喺前一枝嘅燭身範圍,收市價要低過前一日,好似三級向下嘅樓梯咁,反映一浪低過一浪,可靠性會高過三個白武士,意味可能持續下跌,要小心睇路啦。
早晨之星/黃昏之星
「早晨之星」由三枝燭組成,第一枝必須係陰燭;第二枝可陰可陽;第三枝必須係陽燭,燭身頂部要高過第一枝陰燭燭身的一半或以上,有見底回升嘅意味,尤其係出現喺低位;「黃昏之星」同樣由三枝燭組成;第一枝必須係陽燭;第二枝同樣可陰可陽;第三枝必須係陰燭,燭身底部要低過第一枝陽燭至少一半,反映有機會見頂回落。
出現早晨之星/黃昏之星,其實係有轉向意味,而且轉向力度同可靠性都相當高,最常見係用作短線買賣信號,但留意返要配合埋其他技術指標,先可以提高可靠性啦!
曙光初現/烏雲蓋頂
「曙光初現」係陰燭之後出現陽燭,而標準嘅組合型態,就係陽燭開市價低於上日陰燭之收市價,而且陽燭要高於陰燭燭身一半或以上,反映買盤力度算充足,有見底回升嘅意味,尤其係出現喺低位。
「烏雲蓋頂」就相反,出現陽燭之後有陰燭,而陰燭上日開市價須高於上日陽燭最低價,並且陰燭收於接近全時段低位,而收市價要至少低過陽燭燭身嘅一半。出現「烏雲蓋頂」意味有機會見頂回落,尤其係出現喺頂位。
十字胎/身懷六甲
「十字胎」嘅第一枝燭,陰陽都得;第二枝一定要係十字星,而十字星嘅手同腳係唔可以超過前一枝嘅燭身,好似佗B咁,無理由個B仲高過呀媽㗎嘛。十字星代表無明確方向,無論前一個時段係升定跌,佢嘅走勢都會受阻。
而「身懷六甲」嘅組成條件同「十字胎」差唔多,不過第二枝燭手同腳都係唔可以超過前一枝嘅燭身,如果係「陀螺」嘅話可靠性會更高!如果「身懷六甲」出現喺頂或者底,有機會轉勢;而如果係升或跌浪途中,都係被視為缺乏方向。
雙飛烏鴉/穿頭破腳
「雙飛烏鴉」由兩枝陰燭組成,第二枝嘅身要完全超出第一枝嘅手同腳,雙飛烏鴉屬利淡信號,而「穿頭破腳」第一枝燭可陰可陽,第二枝就一定要係陰燭,燭身同樣要完全超出第一枝嘅手同腳。
兩種形態都屬於利淡訊號,出現喺頂位可靠性會高啲。其中穿頭破腳嘅短線影響力幾大,可能影響到中期走勢。點樣分兩著分別呢?通常「雙飛烏鴉」係跌浪中出現,「穿頭破腳」就係圖表頂部出現,要分清楚啦!
好啦,一連三集陰陽燭學堂就差唔多告一段落,但技術分析門派又多又深,「小學雞學堂」一定為大家解答疑難,往後日子將會介紹更多不同學派嘅技術分析,等大家係疫情下留在家中都可以長進知識!
撰文:吳藹林
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票