29/07/2020
《經濟不停學》反向ETF?乜嚟㗎?
呢期大市Chok上Chok落,初入門投資者真係未必識買跌,因為技巧太深或者風險太高。近年來,不少券商發行一種「逆向ETF」可以畀睇跌嘅投資者買入,而最近連A股市場都可以做對沖!
(Shutterstock圖片)
沽空成本太高,PUT輪熊證風險大
(Shutterstock圖片)
股市有升有跌,所以市場一直有唔少看淡產品,好多人講股票可以「買跌」,其實原理係點呢?「買跌」行內稱為沽空,簡單嚟講,假如你睇淡一隻股份,就可以先「借貨」然後喺市場沽出,等股份跌到某一個你認為合理嘅水平就至買入還貨「平倉」,當中嘅差價就係你嘅利潤啦!但當然,如果你沽空之後遇著大升市,要高價追貨平倉,就可能輸到一頸血。
沽空成本唔平,首先你要開一個孖展戶口,而且需要存入120%保證金先可以借貨,即借100萬元嘅貨你首先要存入120萬港元入戶口,仲未計高昂利息。所以往後券商就推出窩輪、牛熊證等衍生工具畀人玩,但係窩輪涉及「時間值」概念,牛熊證一觸及「收回價」就要被「打靶」,BB級投資者真係少啲知識都畀人食咗舊本。
ETF追蹤指數股,入場費及風險低
(Shutterstock圖片)
到後期,美國有個基金佬叫John Bogle,佢創立世界第一個指數型基金,即標準普爾500指數ETF(Exchange Traded Fund)。 ETF玩法簡單,其實佢係一個基金,而呢個基金係追蹤某一個指數或產品,例如本港ETF盈富基金(02800)就係追蹤恒指成份股為主,買盈富就等於買曬恒指入面嘅成份股啦!
喺香港買ETF好處就係入場成本唔算高;其次就係無時間值、回收價等等嘅概念,總之你睇好恒指就買同恒指掛勾嘅ETF就得,風險較低;而且ETF追蹤誤差比衍生工具好,即係比較「貼市」,亦無複雜條款,如果投資者用作對沖,都比起其他衍生工具較為方便!
反向ETF可睇跌,而家連A股都有得睇淡!
(Shutterstock圖片)
如果ETF可以畀人對沖,又點會無睇跌產品呢?睇跌嘅ETF稱為「反向ETF」,本港嘅反向ETF主要分為看空1倍(-1X)或者2倍(-2X),反向1倍即如果指數跌1%,呢個ETF價格就會升1%。而家好多投資者係大跌市時都會買入反向ETF對沖!不過留意返,根據證監會定義,反向ETF只能算係一種「槓桿及反向產品」,所以定義上佢未必係一種基金,不過入場費低,而且唔收印花稅,適合散戶玩!
最近槓桿反向ETF產品終於可以進軍A股市場!分別由南方東英及華夏基金發行,追蹤滬深300指數,本周一(27日)起已經開始買賣,包括南方東英滬深300每日槓桿兩倍(07233)、滬深300每日反向一倍(07333);華夏的滬深300指數每日槓桿兩倍(07272)及滬深300指數每日反向一倍(07373)。
其中兩隻反向1倍ETF,點解咁多人都需要呢?中美角力升溫,有時候投資A股嘅散戶眼見滬深跌一棍大陰,真係心都赤埋;所以長期都需要唔同類型嘅對沖產品。
A股反向產品將愈來愈多,買賣細節需要留意
(Shutterstock圖片)
講返大市,去年MSCI指數慢慢將A股納入因子,目前已經提升到20%,所以近年來A股日均成交已經去萬億人仔,而A股影響力繼續擴大之前,有幾個問題需要解決,其中包括對沖衍生產品工具;不過話返兩頭,內地股市一路都係阿爺主導,而過往阿爺都唔喜歡個市「見綠」,所以跌唔跌呢個問題,真係手掌手背都係肉囉!
講返呢幾隻A股槓桿反向ETF,每手入場費都係700至800蚊左右,其實都對於看好或睇淡A股嘅朋友仔嚟講係幾抵玩。不過留意返,AH股兩地收市時間唔一樣,所以相關產品可能出現同A股偏差情況;而且A股有漲停跌停機制,呢幾隻ETF係價格上會有明顯折損。重點係,相關ETF都係採用「掉期交易」作為追蹤策略,比起一般股指期貨成本要高小小,係追蹤A股時候會有小小誤差,大家要留返啦!
撰文:李皆穎
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情